Këshilltari i ministrit Hasani i reagon Lladrovcit: Projektin nga BERZH’i e ka bërë MTI’ja

Periskopi.com Lajme

Kryetari i Komunës së Drenasit, Ramiz Lladrovci në një status në Facebook ka thënë se BERZh-i, ka miratuar Zgjerimin e Parkut të Biznesit në Drenas me vlerë 15 milionë euro. Por, me këtë nuk po pajtohet Arian Krasniqi, këshilltar i ministrit të Tregtisë, Bajram Hasani.

Krasniqi i ka thënë Lladrovci duhet të tregoj se ky është projekt i MTI-së.

“Kryetar i nderuar, ne e dimë të kemi kampion të shumëfishtë në shumëçka, e në gjithçka më shumë se sa në detyrë që je i thirrur. Ri-negocimin e financimit të këtij projekti nga BERZH’i e ka bërë MTI’ja. Do të ishte e ndershme që të tregoni se këtë angazhim të pandalshëm e ka bërë vullneti dhe qëllimi i mirë i Ministrit z. Bajram Hasani në shërbim të bizneseve vendore. Qëllim ky që i kemi vënë vetes në këtë mandat”, ka thënë Krasniqi.

Kurse, Llagrovci në postimin e tij të më hershem në Facebook ka thënë se ka marrë një lajm të mirë nga BERZH.

“Lajm i mirë nga Londra, BERZh-i, ka miratuar Zgjerimin e Parkut të Biznesit në Drenas me vlerë 15 milionë euro. Lajm i mirë për bizneset dhe krijimin e vende të reja të punës”.

Deputetja e LDK’së ‘godet’ koalicionin qeverisës: Nëse nuk i keni votat për Demarkacion, gjeni tjetër justifikim

Periskopi.com Lajme

Anëtarja e Komisionit për Punë të Jashtme dhe njëherit deputete e LDK’së, Doruntinë Maloku, ka reaguar pas akuzave që u ka bërë Aleanca për Ardhmërinë e Kosovës se kanë ndryshuar marrëveshjen për Projektligjin për demarkacionin ndërmjet Kosovës dhe Malit të Zi.

Maloku në një status në Facebook ka thënë se nuk është ndryshuar asnjë pikë nga teksti i kësaj marrëveshje. Ajo madje thotë se nëse koalicioni qeverisës nuk po arrin t’i mbledhë votat për Demarkacionin, le të përpiqet të gjejë një justifikim tjetër.

Ky është reagimi i plotë i Malokut:

Si anëtare e Komisionit për Punë të Jashtme, e konfirmoj se Amendamenti i propozuar ne seancë nga Shefi i GP LDK, Avdullah Hoti, është 100% i njëjtë me atë që është votuar sot ne mbledhje të Komisionit, dhe pa asnjē kundërshti nga përfaqësuesja e AAK-së, Time Kadriaj, e as nga deputetët e tjerë që përfaqësojnë partitë e koalicionit qeverisës.

Teksti i Amendamentit është identik me tekstin e marrëveshjes së dakorduar ndërmjet LDK-së dhe partive të koalicionit qeverisës fundjavën që e lamë pas.

Atyre që u intereson ta konfirmojnë këtë, mund ta shikojnë deklarimin e z. Hoti sot në seancë, për të cilin nuk pati asnjë kundërshtim, i cili e lexoi Nenin 3 fjalë për fjalë, si dhe deklarimin e znj. Osmani në mbledhjen e Komisionit për Punë të Jashtme!

Nëse koalicioni qeverisës nuk po arrin t’i mbledhë votat për Demarkacionin, le të përpiqet të gjejë një justifikim tjetër!

Se kjo e sontmja nuk pi ujë!

P.S.

Për dëshmi, në linkun e mëposhtëm, ne minutin 55.10, mund të ndiqni deklaratën e shefit të GP LDK, Avdullah Hoti, në seancën e sotme!

Në foto, ndërkaq, e keni tekstin e marrëveshjes për Nenin 3 të Projektligjit të Marrëveshjes për Shënimin e Kufirit ndërmjet Kosovës dhe Malit të Zi, i cili u votua sot ne Komisionin për Punë të Jashtme (Foto 2)

 

Letra ‘kërcënuese’ e Haradinajt: Demarkacioni mund të kthehet në pikën zero

Periskopi.com Lajme

Aleanca për Ardhmërinë e Kosovës ka akuzuar të mërkurën Lidhjen Demokratike të Kosovës se e ka ndryshuar marrëveshjen mes partive për Projektligjin për demarkacionin e kufirit ndërmjet Kosovës dhe Malit të Zi.

Sipas AAK’së, LDK ka ndryshuar marrëveshjen në Komisionin për Politikë të Jashtme, më konkretisht renditjen e pikës 2, e cila është “Dokumentacioni zyrtar i Komisionit Shtetëror për shënimin e Kufirit Shtetëror në mes të Republikës së Kosovës dhe Malit të Zi si orientim”.

Sot, kryeministri i Kosovës, Ramush Haradinaj, ka paralajmëruar udhëheqësit e partive politike se “çdo ndryshim potencial i kësaj marrëveshjeje parimore rreth Projektligjit mund t’i kthej në pikën zero tërë proceset dhe përpjekjet”.

Gazeta Express ka siguruar letrën e Haradinajt për liderët, ku ai paralajmëronte ata kundër ndryshimeve ndaj marrëveshjes, që ai e ka quajtur “përfundimtare”.

Megjithatë, deputetja e LDK’së, njëherësh shefe e Komisionit parlamentar për Punë të Jashtme, Vjosa Osmani, i është kundërpërgjigjur akuzave të partisë së kryeministrit Haradinaj.

“Ne kemi vendosur në votim tekstin e njëjtë, që na është dërguar nga propozuesi”, ka thënë Osmani.

“Pra, tekstin që është propozuar nga Avdullah Hoti në seancë”, ka theksuar deputetja e LDK’së.

Sipas saj, në Komisionin parlamentar për Punë të Jashtme nuk është ndryshuar asgjë.

“Në Komision nuk kemi ndryshuar asnjë pikë të vetme. Po ai tekst është lexuar në Komision dy herë dhe është votuar nga të gjithë qe ishin prezentë, duke përfshirë përfaqësuesen e AAK’së”, është shprehur ajo.

 

 

Djali i kriminelit serb garon për kryetar të Republikës Serbe

Periskopi.com Lajme

Kryetari i Republikës Serbe Milorad Dodik nuka ka dashur ta komentojë lajmin se i biri i Ratko Mladiqit, kriminelit të akuzuar për krime lufte në Bosnjë e Hercegovinë kundër të cilit po zhvillohet procesi gjyqësor në Hagë, është njëri nga kandidatët për kryetar të Republikës Serbe në zgjedhjet paraprake, transmeton Koha.

Dodik, siç njofton rtrs, ka thënë të ketë dëgjuar për këto spekulime, porse, sipas tij, për kandidaturën do të vendosin organet e partisë SNSD.

“Për kandidatë e SNSD-së, opinioni do të njoftohet me kohë”ka thënë Dodik.

Sipas medieve serbe, Darko Mladiq është njëri nga kandidatët e mundshëm të SNSD-së për kryetar të Republikës Serbe në zgjedhjet e përgjithshme.

Thuhet se Mladiq ka hyrë në rrethin e ngushtë të kandidatëve të zgjedhur të SNSD-së për kryetar të Republikës Serbe.

Fshati kosovar ku bora ka arritur në 50 cm (Foto)

Periskopi.com Lajme

Temperatura e ulëta që kanë mbretëruar në këtë javë, janë shoqëruar edhe me borë në tërë Kosovën.

Por, disa vende janë mbuluar dhe më shumë nga bora.

Në fshatin Petrovë të Shtimes, trashësia e borës ka arritur në 50 centimetra.

Kjo ka bërë që të krijohet vështirësi për qarkullim si me vetura ashtu edhe për këmbësorët.

Khloe Kardashian pozon shtatzënë, shikojeni sa bukur duket (Foto)

Periskopi.com Showbiz

Khloe Kardashian është shfaqur tejet bukur në fotografitë e publikuara së fundmi.

Bukuroshja ka bërë disa foto-shooting, ku shfaqet e veshur me një fustan të shkurtër e që ia thekson edhe barkun në të cilin po e bartë fëmijën e saj të parë.

Ndonëse shtatëzënë, Khloe-t nuk i kanë humbur aspak linjat seksi të trupit.

Në foton e fundit shihet edhe gjoksi i saj i formësuar.

“Çka është shkruar të bëhet, gjithmonë do e gjejë rrugën e vet”, ka shkruar ajo.

Marrëveshja e fshehtë e Behgjet Pacollit me Listën Serbe

Periskopi.com Lajme

Demarkacioni në Kuvend, me votat e Listës Serbe, do të votohet javën e ardhshme.

KTV-ja merr vesh se kërkesa nga Beogradi ka qenë që votimi të ndodhë pas zgjedhjeve për kryetar të Beogradit. Për këtë marrëveshje është kujdesur zv/kryeministri Behgjet Pacolli.

Zgjedhjet e së dielës në Beograd e kanë shtyrë edhe për disa ditë hedhjen në votim të demarkacionit në Prishtinë.

Që nga fundjava, ministri i jashtëm, Behgjet Pacolli, e ka shprehur bindjen se të mërkurën nuk do të ketë votim, sikurse edhe ndodhi.

KTV-ja merr vesh se vetë Pacolli ka folur me zyrtarë të kabinetit të presidentit të Serbisë, Aleksandër Vuçiq, për të siguruar votat e Listës Serbe.

Por, kushti nga Serbia ka qenë që të pritet përfundimi i zgjedhjeve për kryetar të Beogradit, që mbahen këtë të diel.

Partia Progresiste e Serbisë e Vuçiqit pritet t’i fitojë zgjedhjet, por nuk do ta ketë aspak të lehtë për shkak të bashkimit të opozitës rreth një kandidati.

Pikërisht për këtë, Vuçiq nuk ka dashur të krijojë imazhin në Serbi se Lista e tij Serbe po i ndihmon shqiptarët për të kaluar pengesën e fundit për liberalizimin.

Kjo vërtetohet edhe me ashpërsimin e tonit të opozitës në Beograd ndaj partisë së presidentit Vuçiq.

Kryetari i Partisë Popullore, Vuk Jeremiq, ka thënë se Vuçiqi e ka betonuar premtimin e tij se do ta lejojë anëtarësimin e Kosovës në OKB, në takimin në Berlin me kancelaren Angela Merkel.

Prandaj, premtimi është që Lista Serbe ta votojë demarkacionin në rastin e parë që vjen në Kuvend, gjatë javës së ardhshme dhe pas përfundimit të zgjedhjeve në Beograd.

Është e paqartë nëse Lista Serbe ka marrë garanci nga pala shqiptare për krijimin e shpejtë të Asociacionit të Komunave Serbe, që është kërkesa e saj kryesore.

Serbe, e udhëhequr nga Goran Rakiq, ka thënë se demarkacioni nuk është askund në listën e tyre të prioriteteve.

Kronologjia e bashkëpunimit shqiptaro-kolumbian në tregtimin e kokainës

Periskopi.com Lajme

Kokaina është një nga drogërat e forta të rralla në Shqipëri. Trafikimi i saj nga vendet e Amerikës Latine si Kolumbia apo Ekuadori konsiderohet me risk të lartë dhe kanë qenë të pakta grupet e zbuluara në këtë fushë. Ajo vjen në Europë e fshehur në kontenierë të mbushur kryesisht me fruta ekzotikë, por edhe e shkrirë në vaj palme apo rroba. Në Shqipëri janë zbuluar disa laboratorë kokaine ndërsa janë vënë në pranga edhe “ekspertë” të huaj për filtrimin e saj.

2001/ Rasti i parë “Journey Italia”

Ishte operacioni më i bujshëm i kohës që çoi në pranga zyrtarë të lartë në polici dhe prokurori të cilët kishin vendosur lidhjet me kartelet kolumbiane për sjelljen në Shqipëri të sasive të mëdha të kokainës. Operacioni përfshiu 7 shtete dhe disa agjenci të huaja zbulimi që lajmëruan homologët shqiptarë të kohës.

Në pranga u vu ish-shefi i policisë gjyqësore, Sokol Koçia. Në krye të gjithë këtij rrjeti u përfol Frederik Durda. Sipas hetimeve të kohës ai kishte udhëtuar deri në Kolumbi ku kishte vendosur kontakte me kartelin Medelin të Pablo Eskobar. Hetuesit thanë se disponojnë foto të Durdës në bordet e helikopterëve privatë, apo pranë vilave dhe kuajve te racës ne Kolumbi. Në Shqipëri, nga 19 qershori 1999, e vizituan njeri pas tjetrit, 4 kolumbiane.

Ai kishte premtuar menaxhimin e tonelatave me drogë, që do të nisnin rrugëtimin nga Kolumbia në Venezuelë, për të përfunduar në Spanjë. Ai kishte planifikuar ndërtimin e një laboratori në Shqipëri. Plani ishte që anija e tij “Privilege” të udhëtonte drejt Spanjës për t’u ngarkuar me serë. Ngarkesa që kishte mbërritur nga Kolumbia, nëpërmjet skafeve të mafias spanjolle, do të strehohej në shtresën e dyfishte te anijes shqiptare qe lundronte me flamur maltez. Prej andej do të përfundonte në Vlorë. Aty do të ndihmonte kreu i policisë gjyqësore Sokol Koçia. Pas përpunimit droga do të nisjej në Itali me skafe dhe gomone.

Në gusht 2000 u kap në Venezuelë një anije me 6 ton kokainë e destinuar për në Europë ndërsa në Holandë u zbuluan 2 ton të tjerë. Nga Shqipëria ishte nisur anija e Durdës për tu ngarkuar me “lëndë të parë”, por ekuipazhi u urdhërua të kthehej. Gjatë kontrollit nga autoritete spanjolle nuk u gjet asgjë, përveç një shtrese të dyfishtë në bord ky dyshohet se do të fshihej droga.

Për 6 muaj pronarët e anijes u mbajtën nën përgjim derisa në 2 shkurt 2001 u vunë në pranga 21 persona në 7 shtete. 7 fletë arreste u prenë në Shqipëri. Frederik Durda, Arben Berballa, Sokol Kociu, Din Gjonaj, Vebi Hysa dhe Alfred Nanaj, u dënuan vetëm me 66 vite burg në total.

2011/ Kokaina e fshehur në vaj palme

Në 6 nëntor 2012, gjykata për Krimet e Rënda dënoi me 17 vite burg Dhimitros (Vullnet) Harizaj për akuzën e trafikimit nga Kolumbia në Shqipëri të 200 kilogramëve kokainë të tretur në vaj palme. Për shkak të gjykimit të shkurtuar u dënua vetëm me 11 vjet e 4 muaj heqje lirie. Bëhej fjalë për trafikimin e një sasie prej 200 kilogramësh kokainë kolumbiane në Shqipëri. Ajo nuk mbërriti asnjëherë në vendin tonë, por “ngriti në këmbë” policitë e disa shteteve të Europës në mars të vitit 2011.

Lënda narkotike u vu re nga autoritetet spanjolle, të cilat po hetonin një linjë të trafikut të kokainës Kolumbi-Europë. Ardhja e kontejnerit ku ndodhej vaji i palmës me kokainë të shkrirë, u mbajt në vëzhgim gjatë gjithë rrugës në sajë të një bashkëpunimi të policive të vendeve përkatëse. Sipas Prokurorisë, emri i Dhimitros Harizajt “doli në skenë” kur kontejneri ndodhej në portin “Antëerp”, në Belgjikë, dhe po pritej për personat që do ta merrnin në dorëzim. Në këtë vend është shfaqur Harizaj, si personi që porositi një kompani transporti maqedonase për ta transportuar kontejnerin në Shqipëri.

Në Belgjikë, nga ana e autoriteteve ngarkesa e kontejnerit u zëvendësua me ngarkesë me ujë, por itinerari i tij nuk “u prish”. Në kontejnerin e boshatisur nga droga u vendosën pajisje sinjalizuese satelitore GPS, për të mbajtur në kontroll lëvizjen e mëtejshme të tij. Sipas Prokurorisë, nga gjurmimi nëpërmjet GPS rezultoi se kamioni ka kaluar nga Belgjika në Luksemburg, Gjermani, Austri, Kroaci, Serbi, Maqedoni dhe së fundmi, më datë 20 mars 2011, nga Maqedonia është futur në territorin shqiptar, nëpërmjet pikës së kalimit kufitar të Qafë-Thanës.

Sipas akuzës, Harizaj kishte informacion të plotë rreth origjinës dhe lëvizjeve të mallit, është personi që ka porositur këtë ngarkesë, ka bërë pagesën e mallit, “vajit të palmës”, ka dhënë lekët për pagesën e qirasë dhe penaliteteve të kontejnerit në Belgjike, si dhe ka dhënë shumën e lekëve që do të shërbente për zhdoganimin e ngarkesës që ndodhej në kontejnerin e mësipërm në doganën e Kakavijës – Gjirokastër, Shqipëri. Para gjykatës prokuroria paraqiti si provë edhe një përgjim telefonik të realizuar nga autoritetet spanjolle, përmes të cilit akuza pretendonte të provonte përfshirjen e një shqiptari në organizimin dhe realizimin e trafikut të kokainës.

2014/ Kokaina e kapur në Mal të Zi

Një sasi prej 250 kilogramë lëndë narkotike e llojit kokainë është sekuestruar nga autoritetet doganore malazeze në portin jugor të Barit. Kokaina, që në fakt është sasia më e madhe që është kapur ndonjëherë nga Mali i Zi, u zbulua në një anije që transportonte banane nga Amerika e Jugut, (Ekuador) dhe që kishte destinacion Shqipërinë. Sasia e lëndës narkotike u gjet e fshehur nën dyshemenë e një prej kontenierëve dhe ishte e ndarë në 200 pako, ndërsa vlera e lëndës narkotike nëse do të hidhej në treg arrin në 17 milionë dollarë. Ngarkesa me bananet ishte porositur nga kompania “Rrapo Company” me qendër në Fier me pronarë Dritan dhe Nezike Rrapaj. Ata u arrestuan, por më pas u lanë të lirë për mungesë provash.

2014/ Laborator kokaine në Fushë Kuqe

Një laborator heroine dhe kokaine u zbulua në qershor 2014 në zonën e Laçit, ku veç sasive të mëdha të drogës, u sekuestruan edhe armë automatike, snajperë dhe lëndë eksplozive. Pikënisja e aksionit ka qenë një kimiste, që dyshohet se punonte për rrjetin e trafikut, ka shkuar nga Tirana në Prishtinë. Në pranga përfunduan 7 persona, 4 në Tiranë, Laç dhe Morinë dhe 3 të tjerë në Kosovë, mes tyre edhe kimistja Valentina Tufa. U zbulua rreth 74 kilogram kokainë. Drejtuesi i këtij rrjeti, ishte Gëzim Çela ende në arrati.

Gjatë operacionit u gjetën në njëk vilë në Fushë Kuqe të Laçit dhe 850 litra përzierës, një mjet i blinduar, si dhe armë e municione luftarake. Kjo godinë dyshohet se ishte kthyer edhe në një laborator droge ku bëhej përzierja, ndarja dhe peshimi i lëndës narkotike me mjetet përkatëse. Në një kasafortë të vilës u gjetën 143 mijë euro, disa orë të kushtueshme dhe bizhuteri të ndryshme. Një laborator tjetër u zbulua në Prishtinë, pikërisht atje ku kontrollohej cilësia e lëndës narkotike para se të nisej në drejtim të Shqipërisë.

2015/ Laboratori i Xibrakës

Ishte janar i vitit 2015 kur në një aksion ku u përfshinë edhe Interpoli dhe Europoli, në fshatin Xibrakë të Elbasanit u zbulua një laborator gjigant për përpunimin e kokainës. Policia tha se zbuloi 100 kg kokainë e pastër, si dhe 4 ton përzierës kokaine në laboratorin e drogës më i madhi i zbuluar në Ballkan. 13 persona përfunduan në pranga, 11 shqiptarë dhe dy kolumbianë që ndodheshin në laborator në momentin e aksionit.

Operacioni u organizuar nga Interpol dhe Europol pas një hetimi disamujor, ku rezultonte se droga mbërrinte e përzier me vaj palme nga vendet e Amerikës Latine, dhe këtu bëhej ndarja e saj. Më pas, droga kishte si destinacion vendet e Europës. Gjatë operacionit u arrestua edhe nipi i ish-diktatorit Enver Hoxha dhe bashkëshorti i këngëtares Rrezarta Shkurta.

Pas një maratone në gjykata, Apeli për Krime të Rënda dënoi 9 të akuzuarit me vetëm 69 vite burg nga 104 vite që dha gjykata e shkallës së parë. Të gjithë të pandehurit përfituan uljen e dënimit me një të tretën. Kreu i grupit, Genci Xhixha dënua në mungesë me 8 vite e 8 muaj burg. Ndërsa Ermal Hoxha, nipi i ish-diktatorit Enver Hoxha u dënua me 6 vite e 8 muaj. Dy kolumbianëve Cesar Avila dhe Valter Moreno iu ulën 4 vite nga dënimi i Shkallës së Parë duke u dënuar përfundimisht me 8 vite burg. Ish-kryeministri Sali Berisha ka akuzuar vazhdimisht se pas këtij laboratori qëndronte Olsi Rama, vëllai i kryeministrit Edi Rama.

2018/ I gjashti i vërteti

Rasti i gjashtë i kapjes së kokainës në Shqipëri është padyshim ai i kapjes së 613 kg kokainë në portin e Durrësit. Ajo kishte mbërritur nga Kolumbia në një kontenier me banane për një kompani në Maminas të Durrësit. Në pranga janë vënë 2 persona ndërsa disa të tjerë janë në kërkim. Vlera e drogës së kapur shkon mbi 180 milionë euro. ©përgatiti LAPSI.al

Dastid Pallaska si Martin Luther King

Periskopi.com Lajme

Avokati kosovar, Dastid Pallaska, që jep edhe opinione publike rreth zhvillimeve shoqërore në vend, ka shkruar një status në Facebook, përmes të cilit ai tregon se si i ëndërron shqiptarët e Kosovës dhe shqiptarët e Shqipërisë.

Interesante e këtij statusi të tij është se Pallaska, ndoshta i frymëzuar nga fjalimi i famshëm i heroit të të drejtave civile në ShBA, Martin Luther King, “I have a dream…” (Kam një ëndërr..), njësoj e fillon statusin e tij në Facebook.

Më poshtë keni shkrimin e Pallaskës në Facebook:

“Kam një ëndërr …

… që një ditë shqiptarët e Kosovës do të lirohen nga patriotët e karrierës që pa nacionalizëm patetik mbesin të papunë; dhe

që shqiptarët e Shqipërisë do të lirohen nga politikanët e pabesë që një shtet të tërë e kanë vendosur në shërbim të narko-trafikantëve.

Edhe normal, që të jetojmë të lumtur ever after!”, ka shkruar avokati Pallaska.

Martin Luter King, mbajti fjalimin që bëri jehonë në të gjithë Amerikën dhe më gjerë.

Në vitin 1963 afrikano-amerikanët ishin mobilizuar në përpjekje për të kapërcyer diskrimimin racor që kufizonte votimin e zezakëve në pjesë të Shteteve të Bashkuara, bllokonte qasjen e tyre në vende të mira pune dhe i kishte zhytur në varfëri. Martin Luter King e mbajti fjalimin në Uashington, para një turme prej më tepër se 250 mijë njerëzve.

Momentet më mbresëlënëse të fjalimit ishin kur King foli për aspiratat e tij personale për vendin.

“Unë kam një ëndërr, që katër fëmijët e mi do të jetojnë një ditë në një vend, ku nuk do të gjykohen nga ngjyra e lëkurës, por nga karakteri i tyre. Sot unë kam një ëndërr.”

Hoti tregon cila është e vërteta rreth ndryshimit të marrëveshjes së Demarkaconit

Periskopi.com Lajme

Kryetari i Grupit Parlamentar të LDK-së, Avdullah Hoti ka reaguar pas akuzave të AAK-së partia e tij ka ndryshuar tekstin e marrëveshjes ndërmjet partive për demarkacionin.

AAK-ja ka thënë se me këtë ndryshim të tekstit të marrëveshjes nga ana e LDK-së çon gjithçka në pikën zero.

Megjithatë Hoti ka postuar edhe një foto të marrëveshjes, mohon akuzat e AAK-së.

“Marrëveshja siç shihet në foton në vijim për nenin 3 të ligjit për demarkacionin është arritur të enjten mbrëma (22 shkurt) me partitë e koalicionit (PDK dhe Nisma). Le ta vërtetojnë këtë të pranishmit në zyrën e kryetarit të Kuvendit. Marrëveshja është shkruar në zyrën e tij. Atë natë Haradinaj nuk dëshironte të komunikate fare. Të shtunën jemi njoftuar se ai e ka pranuar atë. Sot në Kuvend e kam lexuar tekstualisht këtë marrëveshje dhe është aprovuar në Komisionin për Politikë të Jashtme si amendament. Transkripti i Kuvendit e vërteton këtë. Kjo është e vërteta”, ka shkruar Hoti.

Image

Gruaja e Daut Haradinajt shfaqet me stil në fotografinë e fundit

Periskopi.com Showbiz

Bashkëshortja e deputetit të Aleancës për Ardhmërinë e Kosovës, Daut Haradinaj, Lola Haradinaj është një ndër femrat më të bukura.

Ajo padyshim këtë gjë nuk e fsheh dhe shpesh herë publikon edhe fotografi mjaft të mira në rrjetet sociale.

E veshur me shumë stil, me flokët ngjyrë të bardhë, Lola vë në pah një palë syze shumë të veçanta. Ajo në shumë raste është aktive në rrjetet sociale dhe di mjaft mirë si të pozojë para aparateve fotografike.

‘Vuçiq i tha Merkelit se do ta njoh pavarësinë e Kosovës’

Periskopi.com Lajme

Kryetari i lëvizjes Dveri Boshko Obradoviq e ka vlerësuar skandaloze një deklaratë të kryetarit të Serbisë në Berlin.

Sipas tij, transmeton Koha.net, Aleksandar Vuçiq gjatë takimit me Angela Merkel, me atë deklaratë e ka vënë në pikëpyetje integritetin territorial dhe sovranitetin e Serbisë.

Ai shton se Vuçiq në bisedë me kancelaren gjermane ka theksuar se së shpejti do të arrijë marrëveshjen për kufirin e Serbisë e kjo do të ishte njohje e pavarësisë së Kosovës.

Obradoviq në fund ka nënvizuar Vuçiq deri në fund të vitit 2018 ka ndër mend ta nënshkruajë njohjen e Kosovës së pavarur”.

Cilat do të jenë pasojat e përjashtimit të Kosovës nga Regjistri Europian i Arsimit?

Periskopi.com Lajme

Agjencia e Kosovës për Akreditim sot është përjashtuar nga Regjistri Evropian për Sigurimin e Cilësisë në Arsimin e Lartë. U tha se ky institucion evropian mori këtë vendim për shkak të standardit të pavarësisë institucionale. Kjo vie si rrjedhojë e një vendimi të kryeministrit Ramush Haradinaj për shkarkimin e bordit të AKA-së, më 2 tetor të vitit 2017. Në një prononcim për Periskopin, ish-kryetari i Bordit të AKA-së, Blerim Rexha përmend pasojat e shumta pas përjashtimit. Me këtë Qeveri, ai e quan ‘mission imposible’ kthimin e AKA-së në EQAR.

Për shkak të standardit të Pavarësisë institucionale, Agjencia e Kosovës për Akreditim sot u përjashtua nga  Regjistri Evropian për Sigurimin e Cilësisë në Arsimin e Lartë.

Kjo ngjalli reagime të shumta, pasi shkaku i një vendimi të tillë ishte veprimi i kryeministrit Ramush Haradinaj, i cili kishte shkarkuar bordin e kësaj Agjencie.

Në një prononcim për Periskopin, ish-kryetari i Bordit të Kaluar të Agjencisë për Akreditim, Blerim Rexha, i cili aktualisht është profeson universitar ka përmendur një varg pasojash që do të ketë Kosova nga ky vendim.

  1. Humbja e besueshmërisë së programeve të studimeve për të siguruar cilësinë e kërkuara nga tregu i punës,
  2. Dëmtim i gati i pariparueshëm i imazhit të Agjencisë dhe sektorin të arsimit të lartë në Kosovë dhe jashtë saj,
  3. Vendimi i kthen Agjencinë e Akreditimit prapa për 10 vite, pune dhe angazhim në përmbushjen e obligimeve për anëtarësim në EQAR,
  4. Pengon (ndalon) aspiratën e arsimit të lartë në Kosovë për integrim në hapësirën Europiane të Arsimit të Lartë,
  5. Pengon (ndalon) procesin e anëtarësimit të Kosovës në Bolonjë,
  6. Pengon dhe vështirëson procesin e referencimit të Kornizës Kombëtare të Kualifikimeve me Kornizën Evropiane të Kualifikimeve, dhe rrjedhimisht pengesa në mobilitetin e fuqisë punëtore në përgjithësi nga Kosova në Europë,
  7. Humbja e rëndësisë së procesit të akreditimit dhe AKA-se si rregullator kryesor i cilësisë së arsimit të lartë në Kosovë,
  8. Shpërbërja e Agjencisë (mos interesimi dhe largimi i stafit),
  9. Rreziku që kriteret minimale te sigurimit të cilësisë të mos plotësohen nga IAL-të për shkak të dobësimit të AKA-se dhe ndërhyrjeve politike
  10. Prishja e sistemit të arsimit të lartë, dhe humbja e kontrollit për sa i përket hapjes së programeve të reja, mungesave të stafit akademik për programe të studimit, regjistrimi jashtë afateve kohore të studenteve etj.

Ai deklaroi se pas vendimit të Haradinajt, Agjencia më nuk ka qenë e aftë të jetë autonome dhe të marrë përgjegjësi për veprimet e veta.

“Arsyet e përjashtimit i ka sqaruar shumë mirë Këshilli i Regjistrit të EQAR, në Pikën 5, të vendimit 4 faqesh të datës 27 shkurt 2018, “si pasoj shkarkimit të të gjithë anëtarëve të Bordit të AKA, Agjencia më nuk është e aftë të jetë autonome dhe marrë përgjegjësitë për veprimet e veta, ashtu si kërkohet me standarde dhe udhëzues për sigurimin e cilësisë të BE-së”, shtoi ai.

Për Periskopin, ai ka folur edhe për mundësinë e kthimit të AKA-së në Regjistrin Evropian për Sigurimin e Cilësisë në Arsimin e Lartë.

Me këtë udhëheqje të MASHT-it, një gjë të tillë ai e quajti mision të pamundur.

“Në këtë kostelacion të forcave politike dhe me këtë udhëheqje të Ministrisë së Arsimit kjo duket më shumë si “Mission Impossible”!”, ka thënë Rexha për Periskopin.

Siç njoftoi sot Komiteti i EQAR, ata më 6 tetor e kanë kontaktuar ministrin e Sh.A.T. për të marrë informacione shtesë në lidhje me vendimin e marrë. Vetë ministri Bytyqi kishte shpjeguar se vendimi për shkarkimin e bordit të AKA-së ishte bërë bazuar në kërkesën nga kryeministri Haradinaj.

Ministri më tej nuk kishte mundur të shpjegonte as sesi ishin zgjedhur anëtarët e rinj të bordit në fjalë – përcjell Periskopi.

Standardi të cilin e ka thyer Ramush Haradinaj thotë kështu: “Agjencitë duhet të jenë të pavarura dhe të veprojnë në mënyrë autonome. Ato duhet të kenë përgjegjësi të plotë për veprimet e tyre dhe për rezultatet e këtyre operacioneve pa ndërhyrjen e palëve të treta.”/Periskopi

 

 

 

 

 

Vjen reagimi i parë nga LDK, pas akuzave të AAK-së për Demarkacion

Periskopi.com Lajme

Aleanca për Ardhmërinë e Kosovës ka akuzuar të mërkurën Lidhjen Demokratike të Kosovës se e ka ndryshuar marrëveshjen mes partive për Projektligjin për demarkacionin e kufirit ndërmjet Kosovës dhe Malit të Zi.

Në një prononcim për Express, deputetja e LDK’së, njëherësh shefe e Komisionit parlamentar për Punë të Jashtme, Vjosa Osmani, i është kundërpërgjigjur akuzave të partisë së kryeministrit Ramush Haradinaj.

“Ne kemi vendosur në votim tekstin e njëjtë, që na është dërguar nga propozuesi”, ka thënë Osmani.

“Pra, tekstin që është propozuar nga Avdullah Hoti në seancë”, ka theksuar deputetja e LDK’së.

Sipas saj, në Komisionin parlamentar për Punë të Jashtme nuk është ndryshuar asgjë.

“Në Komision nuk kemi ndryshuar asnjë pikë të vetme. Po ai tekst është lexuar në Komision dy herë dhe është votuar nga të gjithë qe ishin prezentë, duke përfshirë përfaqësuesen e AAK’së”, është shprehur ajo.

Kurse, ajo kur është pyetur se ajo që e ka lexuar Hoti në seance a është e njëjtë me tekstin e marrëveshjes së të shtunës, është përgjigjur duke treguar se si Komisioni funksionon me dokumente me shkrim.

“Ne, si Komision, funksionojmë me dokumente me shkrim. Dhe, ai tekst na është dërguar me shkrim”, ka treguar Osmani për Express.

“Të njëjtin, pra, e kemi vendosur në votim, pa asnjë ndryshim. Komisioni ynë nuk ka ndryshuar asgjë”, ka nënvizuar deputetja e LDK’së.

Nëpërmjet një njoftimi, Aleanca për Ardhmërinë e Kosovës ka pohuar se LDK ka ndryshuar marrëveshjen në Komisionin për Politikë të Jashtme.

“Nê tekstin që ka dalë nga ky Komision, jo vetëm që është ndërruar renditja e pikave të dakorduara, por Dokumentacioni zyrtar i Komisionit Shtetëror, është renditur si pikë e fundit dhe jasht Pjesës përbërëse të këtij ligji”, ka deklaruar AAK.

 

Unioni i Studentëve të Kosovës: Ministria e Arsimit po e shkatërron arsimin në Kosovë

Periskopi.com Lajme

Pas përjashtimit të Agjencisë Kosovare të Akreditimit nga Regjistri Evropian i Sigurimit të Cilësisë në Arsimin e Lartë (EQAR), ka reaguar Unioni i Studentëve të Kosovës (USK).

Në reagimin e tyre USK thotë se “jemi të shqetësuar dhe ndihemi të pasigurt me perspektivën e shkollimit tonë pasi Agjencia e Akreditimit te Kosovës (AKA) është përjashtuar nga ‘European Quality Assurance Register for Higher Education’ (EQAR), për faktin se tash e tutje kjo nënkupton se programet tona nuk kanë akreditim ndërkombëtar dhe si pasoj mund paraqiten problemet e para për studentet kosovar, të cilët dëshirojnë t’i vazhdojnë studimet në Universitetet e Evropës”.

USK thotë se nëse vërtetohet se përjashtimi i AKA-së nga EQAR është bërë për shkak të shkarkimit të bordit nga ana e Ministrit aktual të arsimit atëherë  kjo bëhet edhe me shqetësuese, sepse Ministria në vend që të punojë për rritjen e cilësisë dhe afirmimin ndërkombëtar të arsimit kosovar, ajo ka bërë të kundërtën me ndërhyrje politike, me c’rast e ka dëmtuar drejtpërdrejt arsimin universitar të Kosovës në planin ndërkombëtar”.

USK reagon ashpër ndaj kësaj ndërhyrje dhe kërkon urgjentisht sqarime nga Ministri lidhur me këtë.

“Ne si përfaqësues të studentëve në gjithë Republikën e Kosovës kërkojmë dhe i bëjmë me dije Qeverisë dhe Ministrisë së Arsimit që të ndërmarrin hapa dhe të paraqesin mendimin e tyre për gjitha këto vendime që po dëmtojnë rëndë arsimin dhe shkencën duke vepruar në baza politike e partiake, me politika ditore dhe të pamenduara”.
“Ne si studentë assesi nuk pajtohemi me këto ndërhyrje politike në çështjet e arsimit dhe sigurisht ndaj saj do të reagojmë konform vendimeve që do t’i marrim në të ardhmen si Union”, thuhet në reagim.

 

Politikani serb: Vuçiq do t’ia dorëzojë Kosovës karrigën në OKB

Periskopi.com Lajme

Kryetari i Partisë Popullore të Serbisë (Narodna stranka Srbije) Vuk Jeremiq ka deklaruar se kryetari i Serbisë Aleksandar Vuëqi ka ndërmend që shumë shpejt Prishtinës t’ia dorëzojë karrigen në Kombet e Bashkuara në mënyrë që Perëndimi t’ia lejojë mbetjen në pushtet.

“Ai së shpejti do t’ia mundësojë Kosovës karrigen në Kombet e Bashkuara . Vuçiq këtë ua ka premtuar të huajve pasi ka bërë shumë koncesione, para së gjithash rreth krimit të organizuar, shpëlarjes së parave dhe tregtinë me armë. Ai duhet ta bëjë këtë për të mbetur në pushtet”, citon tv nasha të ketë thënë ai.

Jeremiq mendon se Vuçiq në Berlin e ka dhënë betimin e vet se do ta nënshkruajë marrëveshjen gjithëpërfshirëse e cila Kosovës do t’i mundësojë anëtarësimin në KB.

Ndërlikohet edhe më shumë Demarkacioni – AAK akuza të rënda për LDK-në: Keni ndryshuar marrëveshjen

Periskopi.com Lajme

Është ndërlikuar rruga drejt ratifikimit të Projektligjit për demarkacionin e kufirit ndërmjet Kosovës dhe Malit të Zi në Kuvendin e Kosovës.

Nëpërmjet një njoftimi, Aleanca për Ardhmërinë e Kosovës ka pohuar se LDK ka ndryshuar marrëveshjen në Komisionin për Politikë të Jashtme.

“Nê tekstin që ka dalë nga ky Komision, jo vetëm që është ndërruar renditja e pikave të dakorduara, por Dokumentacioni zyrtar i Komisionit Shtetëror, është renditur si pikë e fundit dhe jasht Pjesës përbërëse të këtij ligji”, ka deklaruar AAK.

Njoftimi i plotë i AAK’së:

Kryeministri Haradinaj, Kryetari i Kuvendit Veseli, Shefi i GP Abdullah Hoti, Kryetari Nisma-s Limaj dhe ai i AKR-së Pacolli, kanë arritur marrëveshjen e mësipërme për Demarkacionin!

Ndërkohë teksti i kësaj marrëveshjeje është ndryshuar në Komisioninin për punë të jashtme të Kuvendit, që kryesohet nga LDK-ja, duke e rrezikuar kështu gjithë atë që është arritur me shumë mund për të ardhur deri në këtë pikë.

Nê tekstin që ka dalë nga ky Komision, jo vetëm që është ndërruar renditja e pikave të dakorduara, por Dokumentacioni zyrtar i Komisionit Shtetëror, është renditur si pikë e fundit dhe jasht Pjesës përbërëse të këtij ligji!

Është e papranueshme nëse dikush në këtë fazë, me ose pa vetedije, e rrezikon votimin e një marrëveshjeje të dakorduar.
Prandaj ky është alarm për të gjithë protagonistët e kësaj marrëveshjeje, që të mos bëjnë kalkulime politike, por t’i përmbahen pikë për pikë asaj! Në të kundërtën rrezikohet që gjithçka të kthehet në pikën ZERO!

 

Ju mund të ndihmoni shërimin e regjisorit Bekim Lumi duke dërguar një mesazh (Foto)

Periskopi.com Lajme

Ndihma për shërimin e regjisorit Bekim Lumi po vazhdon sot me anë të një mënyre tjetër.

Me anë të operatorit VALA, duke dërguar SMS do të ndihmohet në trajtimin e kushtueshëm të regjisorit.

Përpos fondeve online, me anë të dërgimit të një SMS në 55103, me tekstin: BEKIM, për shërimin e regjisorit shkojnë automatikisht 1 euro.

Një grup artistësh është mobilizuar që ta ndihmojë Bekimin në këtë sfidë jetësore, dhe kjo përpjekje sot është konkretizuar edhe me bashkëpunimin me operatorin telefonik VALA.

Instituti Hidrometeorologjik përgënjeshtron MAShT-in pas vendimit për mosmbajtje të mësimit

Periskopi.com Lajme

Besim Aliu, parashikues i motit në Institutin Hidrometeorologjik të Kosovës, ka thënë se Ministria e Arsimit, Shkencës dhe Teknologjisë (MAShT) nuk i ka kontaktuar kur ka vendosur që të marrë vendimin për ndërprerjen e mësimit në të gjitha institucionet e arsimit parauniversitar për të enjten dhe të premten.

Ai më tej ka shtuar se sot nuk ka qenë mot i papërshtatshëm për të mos u mbajtur mësimi.

“MAShT-i nuk na ka kontaktuar kur kanë vendosur që të mos mbahet mësim. Sot gjatë ditës temperaturat kanë qenë deri në -4 gradë celsius e moti nuk ka qenë aspak i papërshtatshëm për mësim. Unë i lëshoj të dhënat nëpër emaile e kush i merr unë nuk e di, por unë nuk mund të them që nesër nuk duhet të mbahet mësimi për shkak të temperaturave”, ka theksuar Besim Aliu për Kallxo.com

MAShT fillimisht kishte vendosur që mësimi mos të mbahej ditën e mërkurë.

Ndërsa sot ka vendosur të vazhdojë ndërprerjen e mësimit edhe për dy ditë të tjera, të enjten dhe të premten.

Kjo me arsyetimin se do të mbretërojë mot i ftohtë duke u bazuar në të dhënat e Institutit Hidrometeorologjik të Kosovës.

“Ky vendim është marrë pas mbledhjes së raporteve për gjendjen e krijuar nga temperaturat e ftohta nëpër komuna dhe në konsultim me Drejtoritë Komunale të Arsimit, si dhe duke pasur parasysh të dhënat që dalin nga Instituti Hidro-Meteorologjik i Kosovës”, thuhej në njoftimin e Ministrisë së Arsimit për mosmbajtjen e mësimit për nesër e pasnesër.

Besim Aliu tha se temperaturat do të jenë më të ulëta gjatë natës dhe sipas tij më me vend do të ishte po të mos mbahej mësimi nesër (e enjte) sesa që nuk është mbajtur sot (e mërkurë).

“Nxënësit shkojnë gjatë ditës në shkollë e jo gjatë natës kur është edhe moti më i ftohtë. Ndoshta më mirë kishte me qenë mos me mbajtë mësim nesër sesa sot, sepse sot ka qenë moti i përshtatshëm. E premtja e më tutje janë ditë të mira”, ka përfunduar Aliu.

Besim Aliu ka thënë tutje se nata e sotme do të jetë më e ftohta e vitit 2018.

“Sonte temperaturat do të lëvizin nga -14 deri -16 gradë celcius, do të jetë nata më e ftohtë e vitit 2018, gjatë ditës së enjte temperaturat do të mbesin në minus, por do të rriten në -5 gradë celsius gjatë ditës kurse nga dita e premte pritet të kemi vlera pozitive të temperaturave”, ka theksuar Aliu.

Identifikohet i dyshuari për vrasjen e të riut në Ferizaj

Periskopi.com Lajme

Kryeprokurori i Prokurorisë Themelore të Ferizajt, Shukri Jashari, ka thënë se është identifikuar autori i dyshuar i vrasjes që ka ndodhur sonte në Ferizaj.

“Vrasja është kryer me revole. Jemi në vendin e ngjarjes dhe kaq mund të them për momentin”, tha shkurt ai për Kallxo.com.

 Pak më parë u raportua se një person është vrarë sonte në rrugën “Reçaku” të Ferizajt.

Sipas Policisë Rajonale të Ferizajt viktima është një person i moshës 20-30 vjeçare.

Kryeprokurori Jashari tha se autori i dyshuar për këtë vrasje tashmë është identifikuar dhe Policia është vënë në veprim.

“Ende nuk dihet ndonjë motiv që mund të ketë ndikuar në shkaktimin e vrasjes”, tha kryeprokurori.

Sipas tij, i dyshuari është i moshës afërsisht të njëjtë me viktimën.