Abdixhiku: Në seancë do ta kundërshtojmë këtë paralajmërim skandaloz të Qeverisë për rritjen e rrymës elektrike

Periskopi.com Lajme

Kryetari i Lidhje Demokratike të Kosovës, Lumir Abdixhiku ka bërë të ditur se të enjten në Kuvendin e Kosovës do të kundërshtojnë paralajmërimin e sotëm të Qeverisë sa i përket propozimit të Zyrës së Rregullatorit të Energjisë për rritje të tarifave të rrymës elektrike.

Abdixhiku ka thënë se pret që çdo deputet i përgjegjshëm në Kuvend ta kundërshtojë një vendim të tillë nga Qeveria, duke thënë se nuk mund ta lejojnë një dëm të tillë, përcjell Periskopi.

“Në fillim thanë s’kemi krizë. Më pas i dhanë 100 milionë euro për blerje të energjisë. Para të buxhetit të shtetit që mund t’i përdornim shumë më mirë. Tani kemi edhe krizë, edhe 100 milionë më pak, edhe shtrenjëtim të energjisë.

Papërgjegjësia kushton. Reagimi i vonshëm kushton. Dhe dy javë nga sot, këtë padituri e papërgjegjësi të Qeverisë, përtej 100 milionëshit të djegur tashmë, do ta paguajnë më shumë se gjysma e familjeve kosovare në faturat e tyre mujore të energjisë. Për çdo muaj në vijim, një e treta e pagës mesatare në Kosovë do të shkojë për energji. Tani kjo është krizë”, shkroi Abdixhiku në Facebook.

Ai tha se ky është shtrenjtimi më i lartë i energjisë elektrike në gjithë historinë e Kosovës.

“Përveç se po paguajmë shtrenjtë, përveç se familjet po diskriminohen pa ndonjë kriter logjik, nuk ka as plan e as ide për një zhvillim strategjik afatgjatē energjetik. Vendime të vonshme dhe zgjidhje skandaloze – ky është epilogu i paaftësisë. Jam i bindur, natyrisht, se edhe këtë herë do të gjejnë një fajtor diku në 20 vjet. Por s’ka gjë që mund ta mbulojë këtë jokompetencë. S’ka gjë që mbulon barrën financiare që po ja vënë familjeve kosovare”.

Kujtojmë se ekzekutivi ka bërë me dije se do t’i japë 75 milionë euro për subvencionimin e energjisë për qytetarët dhe bizneset. Por, njoftimi i Qeverisë ka ngjallur kritika të shumta pasi u mor vesh se qytetarëve që shpenzojnë mbi 600 kWh në muaj mund t’u shtrenjtësohet fatura ndoshta dyfish nga shkurti.