Albin Kurti, 2018: Rezolutat janë si llastiku

Kuvendi i Kosovës me 76 vota për, asnjë kundër dhe një abstenim ka miratuar rezolutën kundër organizimit të referendumit serb në Kosovë.

Kjo seancë u thirrë me urgjencë nga vet kryeministri i Kosovës, Albin Kurti i cili dje kishte  takim me QUINT-in.

Kujtojmë se kryeministri, njëherit edhe Kryetari i VV’së, në vitin 2018 kishte kundërshtuar fuqishëm rezolutën e partive të pozitës për dialogun me Serbinë, duke thënë se nëse ligji është si llastiku, rezoluta është aq më tepër e tillë.

Madje Kurti, aso kohe akuzonte presidentin e asaj kohe Hashim Thaçin duke thënë se  ka shkelur secilën rezolutë të Kuvendit, dhe sipas tij këtë mund ta bëjë edhe në të ardhmën.

Popull ua rikujtojmë edhe njëherë këtë shkrim të tij:

Shkrimi i plotë i Kurtit:

Dimri i vetmisë së madhe?

Dihet që Thaçi në ndërmarrjen e tij me Serbinë për “kompromis të dhimbshëm” mbi Kosovën, nuk ka mandat nga Kuvendi dhe e ka popullin kundër. Madje, ai nuk ka as platformë me parime për negociata dhe as ekip negociator. Është i vetmuar. Kështu duhet të ngelet, sepse vetëm kësisoj nuk do të ngjajë ai “kompromisi i dhimbshëm” i paralajmëruar. Thaçi medoemos synon një letër nga Kuvendi, një dokument nga Kuvendi, rezolutë apo çkado qoftë ajo, që mandej të vrapojë te Vuçiqi në Bruksel.

Vështirë se ka mbetur ndonjë rezolutë e Kuvendit pa e shkelur Thaçi si kryeministër apo president. Pse do të ishte ndryshe me rezolutën e ardhshme?! Thaçi do rezolutë pikërisht që të mund ta shkelë atë! Nëse “ligji është si llastiku”, rezoluta është aq më tepër e tillë. Kuvendi që njëmend mbron republikën e demokracinë do t’i bënte rezolutë denoncuese e kundërshtuese Thaçit për shkeljet që ai bëri këtë verë, e jo për vazhdimin e tyre në vjeshtë e dimër. Prandaj, shumë më e fuqishme është mungesa e rezolutës sesa ndonjë rezolutë e fuqishme.

Pas protestës së 29 shtatorit, Thaçi nuk mund të bëjë marëveshje me Vuçiqin. Kuvendi nuk duhet ta ndihmojë Thaçin me rezolutën që ai do ta bëjë llastik. Populli është me opozitën. Ai nuk i nënshtrohet një njeriu. Duhet të qëndrojmë. Dhe, Thaçin e pret dimri i vetmisë së madhe, pa një rezolutë që do shërbente si dhjami për arushën. Ndërkaq, për neve vjen pranvera, e cila nuk e pret dimrin të mbarojë. Kush qëndron, fiton.