Aliu: Marrëveshjet e 20 qershorit do të zbatohen deri në takimin e ardhshëm në mes të dy qeverive

Periskopi.com Lajme

Ministri i Infrastrukturës, Liburn Aliu, ka thënë se Kosova dhe Shqipëria kanë një Sekretariat të përbashkët për zbatimin e marrëveshjeve në mes të dyja qeverive.

Aliu ka premtuar se marrëveshjet e nënshkruara të hënën e 20 qershorit do të zbatohen deri në takimin e ardhshëm në mes të dy qeverive.

Ai ka folur në lidhje me marrëveshjet në mes Kosovës dhe Shqipërisë, ku ka thënë se asnjëherë më parë nuk kanë qenë të vendosur siç është Qeveria Kurti 2 që t’i zbatojë marrëveshjet, jo vetëm marrëveshjet që i ka nënshkruar kjo qeveri por dhe ato në të kaluarën që ishin nënshkruar nga qeveritë e kaluara.

Sipas tij, Gentian Sala, në ekipin e tij, ka anëtarë nga të dyja qeveritë, dhe detyrat e këtij Sekretariati janë të merren me zbatimin e marrëveshjeve, ku herë pas here bëjnë kontrolle në ministritë dhe gjithashtu, përkujdesen që ato të zbatohen.

“93 për qind të marrëveshjeve që i kemi nënshkruar i kemi zbatuar gjeri më tani” ka thënë ai ne RTV Dukagjini.

Tutje, ai ka folur edhe për marrëveshjet që i kanë realizuar të hënën e 20 qershorit ku ka premtuar se deri në mbledhjen e ardhshme në mes të dy qeverive do të jenë të zbatuara.

“Në çdo mbledhje duhet t’i kemi marrëveshjet e përfunduara dhe vetëm duhet të bisedohet për vazhdimin e punëve te tjera” ka theksuar ai.

Aliu ka bërë të ditur se dy grupet punuese janë shkrirë për ta themeluar Sekretariatin e përbashkët për të dyja shtetet.