Arratisja e pabesueshme e 6 palestinezëve nga burgu më i rreptë i Izraelit

Periskopi.com Lajme

Gjashtë të burgosur palestinezë nën mbulesën e natës u arratisën nga një nga burgjet më të ruajtura në Izrael, burgu Gilboa, pas së cilës policia izraelite nisi një kërkim masiv për të arratisurit.

Të burgosurit hapën një vrimë në qelinë e tyre që i çoi në një hapësirë të zbrazët nën burg nga e cila ata pastaj gërmuan një mini-tunel drejt murit të jashtëm të ndërtesës, shkruan BBC.

Arratisja e tyre u vu re nga fermerët përreth të cilët i vunë re që vraponin nëpër ara. Mes të arratisurve është ish-udhëheqësi i Brigadës Al-Aksa, ndërsa pesë të tjerët janë anëtarë të Xhihadit Islamik.

Një zyrtar izraelit i burgut e quajti arratisjen “një dështim të madh të sigurisë dhe inteligjencës”. Militantët palestinezë, nga ana tjetër, e quajtën grupin e arratisjes “një bëmë heroike”.

Burgu Gilboa ndodhet në veri të Izraelit dhe njihet për masa të rrepta të sigurisë. Një raport për një arratisje të mundshme u mor nga administrata e burgut nga fermerët aty pranë në mes të natës, pas së cilës filloi menjëherë numërimi i të burgosurve. Ajo u krye rreth orës 4 të mëngjesit, gjatë së cilës u përcaktua se gjashtë të burgosur ishin zhdukur.

Besohet se palestinezët kanë ikur nga burgu duke hapur një vrimë në banjë. Jerusalem Post shkruan se ata përdorën një pirun të ndryshkur për të gërmuar.

Vrima që ata hapën i çoi në një hapësirë të zbrazët nën burg që ishte formuar gjatë ndërtimit të burgut. Një polic izraelit e quajti hapësirën e zbrazët një “gabim strukturor” nga burgu.

Policia beson se të burgosurit, duke lëvizur nëpër hapësirën e zbrazët, erdhën deri te muri i jashtëm i burgut dhe më pas gërmuan një tunel të vogël që të çon pikërisht në rrugën përpara burgut.

Shërbimi izraelit i sigurisë Shabak (i njohur si Shin Bet) tha se hetuesit e tyre besojnë se të arrestuarit ishin në kontakt me njerëzit jashtë burgut duke përdorur një telefon të kontrabanduar, të cilët i prisnin me një makinë menjëherë pas arratisjes.

Sa i përket vetë të arratisurve, emri më tingëllues midis tyre është Zakaria Zubeidi, një ish-komandant i grupit militant të Brigadës së Dëshmorëve Al-Aksa. Zubeidi ishte në pritje të gjykimit në burg nën dyshimin për përfshirje në sulmet ndaj izraelitëve.

Pesë të tjerët janë anëtarë të grupit militant Xhihadi Islamik – katër prej tyre kanë vuajtur dënimin me burgim të përjetshëm për planifikimin dhe kryerjen e sulmeve në të cilat izraelitët u vranë. Personi i pestë, nga ana tjetër, ka qenë në paraburgim për dy vjet, pa u akuzuar për ndonjë krim specifik, raportojnë mediat izraelite.

Shpërndaje në: