Avdullah Hoti merr meritat për rritjen ekonomike të vitit 2021 derisa tregon faktorët konkretë të saj

Periskopi.com Lajme

Ish-kryeministri i Kosovës, Avdullah Hoti ka thënë se tejkalimi i krizës ekonomike i shkaktuar nga pandemia Covid-19 është si rezultat i faktorëve që janë bërë në vitin 2020, e jo ashtu siç po proklamon Qeveria Kurti.

Hoti ka renditur tre faktor si kryesor në rimëkëmbjen ekonomike të Kosovës, të cilët janë marrë gjatë kohës kur vendi udhëhiqej nga ai.

“Të tre këta faktorë lidhen me zhvillimet në vitin 2020:

(1) Pakot e rimëkëmbjes ekonomike (përfshirë tërheqjen e kursimeve nga Trusti Pensional) që kanë mundësuar të futen në ekonomi rreth 700 milionë euro;

(2) Koordinimi i Qeverisë dhe Bankës Qëndrore gjatë vitit 2020 për ri-programim të kredive të bizneseve dhe qytetarëve për të shtyrë pagesën e interesit dhe kryegjësë për disa muaj; dhe

(3) Dërgesat e diasporës gjatë vitit 2020 që kanë arritur nivele rekorde.”, ka shkruar ai, transmeton Periskopi.

Shkrimi i tij i plotë

KUSH ËSHTË BURIMI I RRITJES EKONOMIKE TË VITIT 2021?

Janë tre faktorë që kanë mundësuar tejkalimin e shpejtë të krizës ekonomike të shkaktuar nga pandemia covid-19 dhe kthimin e ekonomisë së Kosovës në trajektoren e saj të rritjes ekonomike, e cila trajektore zanafillën e ka në pakot fiskale 1 dhe 2 të viteve 2014-2017.

Të tre këta faktorë lidhen me zhvillimet në vitin 2020:

(1) Pakot e rimëkëmbjes ekonomike (përfshirë tërheqjen e kursimeve nga Trusti Pensional) që kanë mundësuar të futen në ekonomi rreth 700 milionë euro;

(2) Koordinimi i Qeverisë dhe Bankës Qëndrore gjatë vitit 2020 për ri-programim të kredive të bizneseve dhe qytetarëve për të shtyrë pagesën e interesit dhe kryegjësë për disa muaj; dhe

(3) Dërgesat e diasporës gjatë vitit 2020 që kanë arritur nivele rekorde.

Dy faktorët e parë janë rezultat i veprimeve qeveritare dhe institucionale, ndërsa i treti lidhet me natyrën altruiste të diasporës tonë për të ndihmuar të afërmit në Kosovë.

Këto veprime kanë mundësuar që kriza të tejkalohet qysh në tremujorin e parë të vitit 2021 dhe t’i kthehemi rritjes ekonomike solide gjatë gjithë këtij viti.

Ekonomistët e mirëfilltë duhet të gjurmojnë lidhjet shkak-pasojë, e jo të interpretojnë të dhënat shumë përciptas duke e shtrembëruar të vërtetën me apo pa qëllim.