Babai i Mateos: Më mirë të isha futur me të në dhe

Babai i Mateos së vrarë në mënyrë monstruoze është shprehur për mediat se nuk kishte çfarë të shikonte në momentin që kishte gjetur trupin e të birit të masakruar.

I prekur dhe në gjendje jo të mirë, ai tha se më mirë të ishte futur në dhe bashkë me djalin e tij të mitur sesa të jetojë me këtë dhimbje.

“E pashë unë si prind çfarë të shikoja, të isha futur bashkë me të”, tha ai për mediat.

Vrasja e tetëvjeçarit Mateo Vasiu dy ditë më parë nga fqinji i tij ka tronditur mbarë opinionin duke sjellë reagime nga qytetarë, të njohur të tij dhe figura të politikës.

Tetëvjeçari u përcoll për në banesën e fundit mes lotësh dhe dhimbjesh nga familjarë, shokë dhe qytetarë të Fierit dje.

Vogëlushi u rrëmbye dhe më pas u vra më 16 nëntor në fshatin Grecalli të Fierit nga fqinji i tij 38-vjeçar Klodian Çalamani.

Banorët janë shprehur se autori ka qenë problematik, ndërsa kërkojnë dënimin më të rëndë për të deri në varje në mes të Fierit.

Ata janë shprehur se nuk ndihen të sigurt pas ngjarjes së rëndë të ndodhur një ditë më parë, duke dhënë detaje edhe për jetën që bënte autori./ TCh