Bashkaktivisti i Astrit Deharit: Kurti s’e përmendi kurrë Astritin kur ky ishte në burg

Bashkaktivisti i Astrit Deharit: Kurti s’e përmendi kurrë Astritin kur ky ishte në burg

Aktivisti i PSD-së dhe ish aktivisti i VV-së, Frashër Krasniqi  që kishte qenë i akuzuari bashkë me Astrit Deharin ka reaguar ndaj ish partisë së tij që tashmë është në pushtet për vdekjen e këtij të fundit.

Ai ka denoncuar kryeministrin Albin Kurti se gjatë periudhës sa Astrit Dehari, e madje edhe ai vet, kishin qenë në paraburgim nuk kishte pasur asnjëherë ndonjë prononcim nga Albin Kurti për rastin e tyre.

“S’e zuri në gojë as atë dhe as rastin e padrejtë gjyqësor ndaj nesh, për dy muaj resht pas arrestimit tonë.” – tha z. Krasniqi, përcjell Periskopi.

Më tej, ai ka akuzuar Vetëvendosjen që e ka gjithë pushtetin politik në vend se nuk ka bërë asgjë për zbardhjen e rastit të shokut të tij.

“Kur vdekja e tij ishte e përdorshme, 3 vite pa drejtësi u dukeshin tepër shumë, zotoheshin që drejtësinë për të do ta kishin prioritet qeverisës, ankoheshin që 5 vjetori nuk duhet të na gjejë me kërkesën për drejtësi, flisnin për të në çdo tubim elektoral.” – vijon më tej ai.

Kujtojmë që Vetëvendosje ka pushtetin e plotë për më shumë se shtatë muaj në vendin tonë, derisa e ka pasur edhe në pesë muaj të tjerë gjatë vitit të kaluar.

Statusi i plotë:

Astrit Dehari. Emri të cilin Albin Kurti dhe Vetëvendosja nuk e hoqën nga goja për 4 vite resht. Emri të cilin Albin Kurti e përmendi vetëm pasi vdiq. S’e zuri në gojë as atë dhe as rastin e padrejtë gjyqësor ndaj nesh, për dy muaj resht pas arrestimit tonë. Astrit Dehari. Emri të cilin Albin Kurti filloi ta përmendte vetëm pasi iu bë i përdorshëm politikisht dhe elektoralisht. Emri të cilin Albin Kurti nuk e përmendi më asnjëherë prej ditës kur e mori pushtetin me 51% të votave.

Ka dy vite që Albin Kurti dhe Albulena Haxhiu kanë pushtet. Ka 8 muaj që Albin Kurti dhe Albulena Haxhiu kanë shumë pushtet. Mbi 51% të pushtetit. Por s’ka asnjë veprim për ta vënë drejtësinë për Astritin në vend. Kur vdekja e tij ishte e përdorshme, 3 vite pa drejtësi u dukeshin tepër shumë, zotoheshin që drejtësinë për të do ta kishin prioritet qeverisës, ankoheshin që 5 vjetori nuk duhet të na gjejë me kërkesën për drejtësi, flisnin për të në çdo tubim elektoral.

Por ja ku jemi. Vetëvendosja duke bërë homazhe, nga pozita e një pushteti që nuk ka bërë asgjë për të sjellë drejtësinë për Astritin. Sepse për ta Astriti kishte një funksion elektoral. Ai funksion u krye. Prandaj tash duan ta mbajnë në nivel homazhi. Në nivel përkujtimi. Tash kur janë në pushtet, më nuk thërrasin për drejtësi. Thërrasin për përkujtim. Edhe atë vetëm një herë në vit. Në përvjetorin e vdekjes së tij.

Sepse sot, thirrja për drejtësi për Astritin është thirrje që duhet t’ia drejtojnë vetes. Duhet t’i drejtohet qeverisë. Qeverisë Kurti. Sot, Albin Kurti dhe Albulena Haxhiu duhet të mbajnë përgjegjësi për mos-veprim në vënien e drejtësisë në vend. Ose së paku duhet të pranojnë para qytetarëve të Kosovës që kanë mashtruar e keqpërdorur elektoralisht e politikisht, me vdekjen e shokut tonë, bashkaktivistit, Astrit Dehari.

Shpërndaje në: