BE gjobit me 875 milionë euro BMW e VW, ja si shpëtoi Mercedesi

BE gjobit me 875 milionë euro BMW e VW, ja si shpëtoi Mercedesi

BE ka gjobitur prodhuesit gjermanë të makinave me plot 875 milionë euro. Zëvendëspresidentja ekzekutive e BE-së, Margrethe Vestager, e motivoi këtë penalitet me komplotin e prodhuesve për të kufizuar zhvillimin e teknologjisë së emisioneve të pastra.

I ashtuquajturi “grupi i të pestëve” (BMW, Volkswagen, Audi, Porsche dhe Daimler) sipas Vestager, në periudhën 2009-2014, zhvilluan takime teknike për të rënë dakord mbi frenimin e risive teknologjike që mund të zvogëlojnë gazrat e dëmshme të oksidit të azotit të makinave me naftë.

Pjesën më të madhe të gjobës prej 502 milionë euro do ta paguajë VW, pavarësisht se iu dha një ulje prej 45 për qind për bashkëpunimin me hetuesit. BMW gjobitet me 373 milionë eurot e mbetura.

Ndërkhë Daimler – kompani ku bën pjesë Mercedes Benz – u përjashtua nga gjoba, pasi ishte ajo që informoi Brukselin për ekzistencën e këtij “karteli”. Nëse nuk do ta kishte bërë, do të ishte gjobitur me 727 milionë euro.

“Pesë prodhuesit e makinave Daimler, BMW, Volkswagen, Audi dhe Porsche poseduan teknologjinë për të zvogëluar emetimet e dëmshme … por e shmangën përdorimin e plotë të kësaj teknologjie”, tha Vestager në një deklaratë.

Vendimi vjen pak para se Komisioni Evropian të bëjë publike disa propozime që do të çojnë përpara Marrëveshjen e Gjelbër të BE-së.

Kartelet zakonisht komplotojnë për të rregulluar çmimet. Komisioni tha se kjo është hera e parë që ka arritur në përfundimin se bashkëpunimi mbi zhvillimin teknik është një kartel, një lloj bashkëpunimi i cituar në traktatet e BE-së.

Komisioni u shkroi një letër prodhuesve të makinave për të dhënë udhëzime se çfarë lloj diskutimesh lejohen të bëjnë konkurrentët – përfshirë diskutimet mbi vendosjen e standardeve dhe pozicionet e përbashkëta mbi legjislacionin.

Komisioni vendosi të mos ndjekë disa nga akuzat fillestare kundër kompanive, sipas të cilave ata koordinuan “për të shmangur, ose të paktën për të vonuar” futjen e një lloji të ri të filtrit në makinat me benzinë. Brukseli tha se “provat ishin të pamjaftueshme” për të provuar këtë akuzë.

Shpërndaje në: