Benzema vetëm një gol larg rekordit të madh

Karim Benzema është vetëm një hap larg barazimit të rekordit të ikonës së Real Madridit, Raul Gonzalez.

Ish-sulmuesi spanjoll i kishte shënuar 323 gola me fanellën e bardhë për më shumë se 15 vjet si lojtar i ekipit kryeqytetas spanjoll.

Ndërsa, sulmuesit francez i kanë mbetur edhe katër ndeshje deri në fund të sezonit për ta barazuar apo edhe kaluar ish-futbollistin e Schalkes.

Aktualisht, favoriti i Topit të Artë për vitin 2022 i ka 322 gola në total.

34 vjeçari i ka realizuar 43 gola në 43 ndeshje këtë sezon deri tash.

Prej tyre, i ka shënuar 26 gola në La Liga dhe 15 në Champions League, ndërsa dy i ka realizuar në Superkupën e Spanjës.

Përfaqësuesi francez e nisi këtë sezon me 279 gola, 11 prapa Santillanas e 29 prapa Di Stefanos, që i zënë pozitat pesë dhe katër.

Mirëpo, sezoni fenomenal e ndihmoi atë që t’i kalojë të lartpërmendurit dhe ta shohë veten në pozitën e tretë aktualisht.

Por, shumë shpejt ai do të bëhet golashënuesi i dytë më i mirë në histori të klubit pasi është shumë afër Raulit.
Megjithatë, ish-futbollisti i Lyonit është shumë larg primatit, të cilin e mban Cristiano Ronaldo.

Ylli portugez i kishte realizuar 450 gola në 438 ndeshje për “Mbretërit” e Spanjës, një rekord praktikisht i pathyeshëm.