E goditën me shishe në kokë Payetin, dënim me një ndeshje pa tifozë për Lyonin

Pas incidenteve në ndeshjen Lion-Marsejë dhe shtyrjes së takimit për një datë të mëvonshme, kanë mbërritur edhe masat e para nga komisioni disiplinor i LFP, liga franceze e futbollit.

Vendimi është ai i skualifikimit për një ndeshje të Stadiumit Grupama (ish-Parc OL), “si masë paraprake” dhe “deri në dënimin përfundimtar”, që mund të jetë më e rëndë.

Ndeshja e radhës në shtëpi e skuadrës së Bosz, e planifikuar për të mërkurën më 1 dhjetor kundër Reims, do të luhet pa tifozë, ndërsa sanksionet përfundimtare do të shpallen në datën 8.

Ndeshja e kampionatit u ndërpre vetëm 6′ pas fillimit, pasi një shishe me ujë e hedhur nga tribuna goditi në kokë Dimitri Payet.

Lojtari i OM mori ndihmën e mjekëve dhe, pasi u përpoqën të qetësonin tifozët, arbitri dhe kapitenët e dy skuadrave vendosën të ktheheshin në dhomat e zhveshjes duke e pezulluar përkohësisht ndeshjen, përpara se LFP të zgjidhte për shtyrjen përfundimtare.

Nga fillimi i sezonit, Ligue 1 është trazuar nga episode të këtij lloji: precedenti më i bujshëm është ai i Nice-Marseille më 22 gusht, ndeshje që u ndërpre në minutën e 28′ pas një rrahje masive mes tifozëve, lojtarëve dhe stafeve teknike të klubeve. Edhe në atë rast, ishte një shishe e hedhur nga tribuna në drejtim të Payet, reagimi i të cilit kishte bërë që tifozët të pushtonin fushën për të kërkuar një përplasje fizike. Me atë rast, Komisioni Disiplinor vendosi që ndeshja të riluhej në fushë neutrale dhe me dyer të mbyllura (ndeshja u zhvillua më 27 tetor dhe përfundoi 1-1), Nice u sanksionua me 2 pikë dënim në renditje (njëra prej të cilave pezull) dhe me 3 ndeshje skualifikim të fushës.

Në pritje të një opinioni përfundimtar nga Komisioni Disiplinor për aspektet sportive, ndërkohë, Olympique Marseille ka lëvizur në nivelin e drejtësisë së zakonshme dhe ka bërë një denoncim zyrtar ndaj personave të panjohur për agresionin e pësuar ndaj Payet. Katër persona tashmë janë arrestuar nga policia mbrëmjen e së dielës dhe dy prej tyre janë ende në paraburgim. Ata të dy akuzohen se kanë marrë pjesë në incidentet që çuan në ndërprerjen e lojës dhe njëri mes të dyve është autori material i hedhjes së shishes.