Estonia ia kthen Rusisë, ia dëbon diplomatin

Estonia ka thënë se nuk do t’i lëshojë vizë një diplomati rus si kundërpërgjigje ndaj dëbimit të një diplomati estonez nga Rusia muajin e kaluar.

Ministria e Jashtme e Estonisë tha në një deklaratë të hënën se shpreson që “pavarësisht veprimit të saj asimetrik, Federata Ruse do të përmbahet nga eskalimi i mëtejmë i situatës”, shkruan Free Europe.

Talini dëboi një diplomat rus në korrik, pasi Rusia për një kohë të shkurtër e ndaloi konsullin estonez në Shën Petersburg, Mart Latte, i cili më pas u shpall person non grata nën dyshimin për marrje të dokumenteve të klasifikuara.

Estonia e kishte cilësuar rastin si veprim të paligjshëm dhe provokues.

Rusia iu kundërpërgjigj dëbimit të diplomatit të saj nga Estonia me dëbimin e një punëtori të Ambasadës së Estonisë në fillim të gushtit.

Rusia është përfshirë në veprime hakmarrëse diplomatike të ngjashme edhe me shtete të tjera evropiane muajve të fundit.