Ford prodhon makinën e re elektrike në platformat e Volkswagen

Periskopi.com Tech & Auto

Ford ka njoftuar se do të ndërtojë një makinë të re elektrike në Evropë duke përdorur kornizën mekanike të Volkswagen – një platformë për automjetet me bateri dhe se do të shpenzojë 1 miliard dollarë për të rindërtuar një fabrikë në Gjermani për të prodhuar makina me emisione zero.

Presidenti i Fordit në Evropë Stewart Rowley u tha gazetarëve sot se fabrika në Këln do të ndërtojë një model të automjetit elektrik të pasagjerëve që do të hynte në treg në mes të vitit 2023 dhe është e mundur që një model tjetër të prodhohet atje.

Ai tha se ishte pjesë e përpjekjeve të Ford për të ofruar versione plotësisht elektrike ose gazo-elektrike të të gjitha automjeteve të pasagjerëve në Evropë deri në vitin 2024, të gjitha do të jenë plotësisht elektrike deri në vitin 2030. Kompania parashikon që deri në vitin 2030, dy të tretat e shitjeve të automjetit të saj komercial në Evropë do të jenë elektrike ose hibride.

Marrëveshja me Volkswagen, e cila lejon përdorimin e kornizës mekanike të asaj kompanie gjermane për makinat elektrike, e njohur nën shkurtesën gjermane MEB (set mjet elektrik modular), i mundëson Fordit të përfitojë nga investimet e mëdha të Volkswagen në makina elektrike ndërsa e gjithë industria kalon në zero ndotjen lokale.

Platforma Volkswagen përdor baza standarde mekanike si bateria, rrotat dhe boshtet që mund të përshtaten për të prodhuar modele të ndryshme automjetesh.

Prodhuesit e makinave në Evropë duhet të shesin më shumë automjete elektrike për të përmbushur kufij të ri, më të ulët të emetimit të dyoksidit të karbonit, gazit kryesor që shkakton ngrohjen globale. Nëse prodhuesit nuk e mbajnë emetimin mesatar të të gjithë flotës së tyre nën kufirin, ata do të paguajnë gjoba të mëdha. Rowley tha se Ford mund të shmangë gjobat.

Kompania tha se automjetet tregtare janë çelësi i rritjes dhe përfitimit në Evropë, me produkte dhe shërbime të reja përmes një aleance me Volkswagen dhe një ndërmarrje të përbashkët midis Ford dhe Otosan në Turqi.

“Investimi i njoftuar, i cili do të bëhet deri në vitin 2025, është ndër më të rëndësishmit e Ford për më shumë se një brez dhe “nënvizon angazhimin tonë për Evropën dhe të ardhmen moderne”, tha Rowley.

Ford tha se investimi në fabrikën në Këln, me më shumë se 4,000 punëtorë, po fillon pasi operacionet evropiane të Ford u kthyen në fitim në tremujorin e katërt të vitit 2020.

Ky investim është pjesë e qëllimit të Ford për të shpenzuar të paktën 22 miliardë dollarë në automjete elektrike nga 2016 deri 2025.

Shpërndaje në: