Gjetje e re arkeologjike, në Nevsehir të Turqisë zbulohet një manastir

Pas kishës ortodokse dhe afreskëve unikale në parkun arkeologjik të qytetit nëntokësor në Nevsehir, arkeologët kanë arritur në një tjetër zbulim të rëndësishëm. Bëhet fjalë për një manastir i cili njëjtë sikur kisha, daton nga shekulli i pestë.
Gjatë realizimit të projektit për restaurimin e kalasë në Nevsehir u gjet një qytet nëntokësor, ku Drejtoria për Ndërtim Banesor (TOKI) ndaloi projektin për ndërtimin të një lagjeje, ndërsa tokën ja ktheu pushtetit lokal për gjurmime të mëtejme.

Ministria turke e Kulturës dhe Turizëmit angazhoi specialistë të cilët punojnë në gërmimet e qytetit nëntokësor, ku zbulimet flasin për një pasuri të madhe kulturore dhe historike.

Kryetari i Nevsehirit, Hasan Unver, deklaroi për AA se arkeologët dhe shkencëtarët ngazëllehen me secilën metër të zbuluar sepse janë të vetëdijshëm se kjo hapësirë fsheh shumë artefakte dhe objekte siç është manastiri i sapo zbuluar i ndërtuar brenda shkëmbit.

“Po arrijnë ekspertë nga e gjithë bota. Ne jemi duke punuar në një pastrim sipërfaqësor të manastirit, dhe më pas do vijojmë me pastrim më të detajuar. Tashmë kemi gjetur një numër të artefakteve interesante dhe të vlefshme të cilat i dorëzuam në muze “, tha Unver.

Në fillim të këtij viti në zonën e zbuluar u gjet një kishë 1.500-vjeçare ortodokse me afreske murale, të cilat asnjëherë më parë nuk janë hasur, ndërkohë që është zbuluar edhe një kompleks i plotë banimi ku përfshin stallat ushtarake.

Qyteti i zbuluar nëntokësor gjendet në qendër të Nevsehirit dhe tashmë është shpallur lokacion arkeologjik i shkallës së tretë. Kjo me siguri do të pasurojë ofertën turistike të kësaj zone, ndërsa Unver tha se vitin e ardhshëm do të jetë e hapur një pjesë e kompleksit edhe për turistët.