Gjyqtari i Premier Leagues: Njerëzit e dinë se jam homoseksual dhe e pranojnë

Periskopi.com Sporti

Në Angli është dita kombëtare e daljes hapur dhe gjyqtari James Adcock ka folur për eksperiencën e tij: “Njerëzit e dinë që jam homoseksual dhe e pranojnë: jam me fat për këtë – tha arbitri për mikrofonët e Podcast Sport LGBT në BBC.

”Të gjithë kolegët e mi e dinë këtë. Kishte interes, kishte nga ata që më thanë: ‘Jam krenar për ty James, që je në gjendje të jesh hapur homoseksual në sport’, sepse ata e dinë se ka ende barriera për t’u shembur. Por unë kurrë nuk kam qenë viktimë e fyerjeve homofobike”.

Adcock, 37 vjeç dhe me mbi 500 ndeshje të arbitruara në karrierë, ka qenë profesionist me kohë të plotë që nga viti 2016, arbitron në Championship dhe bën arbitrin e katërt në Premier League. Ai e ka zbuluar homoseksualitetin e tij, në botën e futbollit, rreth dhjetë vjet më parë, por tani ka vendosur të flasë publikisht për rrugëtimin e tij, duke shpresuar të ndihmojë ata që ende mendojnë se duhet të fshihen në një farë mënyre: “Shumë arbitra mendojnë se nuk mund të dalin hapur sepse mund të ndikojë në karrierën e tyre – tha ai.

”Por ju nuk gjykoheni nga seksualiteti juaj dhe nëse jeni mjaft të sigurt në veten tuaj, do të keni të gjithë mbështetjen e çdo kolegu. Të deklarohesh homoseksual sidoqoftë është një zgjedhje që duhet ta bësh si person, jo si arbitër. Më trajto siç do të trajtonit këdo tjetër. Je aty si tifoz, lojtar ose trajner dhe më gjykon për performancën time. Kjo është ajo për të cilën unë jam gjykuar. Nuk arbitroj sepse jam gay, por vetëm sepse jam arbitër”.