I sanksionuari nga SHBA: Për pesë vjet, Srpskan e shoh të pavarur
Anëtari serb i Presidencës së Bosnjës dhe Hercegovinës, Millorad Dodik, deklaroi dje se e sheh Republikën Srpska si shtet të pavarur në pesë vjetët e ardhshme.
Dodik vlerësoi se Bosnja dhe Herecegovina “mbijeton vetëm sepse mbahet nga faktori ndërkombëtar”, duke shtuar se “forca” është e vetmja gjë që ka mbetur për ta ruajtur atë.
“Tani Milorad Dodik është sulmuar ashpër,” i tha ai RTRS, duke deklaruar se do të ishte shumë më e lehtë të tregohej unitet politik në Republikën Srpska.
Duke folur për sanksionet që i vendosi SHBA-ja pak ditë më parë, Dodik vlerësoi se amerikanët janë “gati të shkojnë deri në fund”.
“Dhuna nuk i lutet Zotit dhe Zoti nuk e do dhunë”, përfundoi Dodik, duke theksuar se të huajt po i kërkojnë të ndryshojë retorikën.
Ai përsëriti se në fillim të javës së ardhshme do të takohet me presidentin serb Aleksandar Vuçiq.
Në ndërkohë kryeministrja e Serbisë, Ana Bërnabiq, deklaroi dje në Banja Llukë se “Republika Srpska është fryt i dëshirës së popullit serb për të jetuar në paqe dhe për të parandaluar krimet e kryera kundër popullit serb gjatë Luftës së Dytë Botërore”.
Kryeministrja e Serbisë, në ceremoninë që u mbajt me rastin e Ditës së Rrepublikës Srpska, tha se marrëdhënia mes Serbisë dhe Bosnjes e Hercegovinës “u bë e veçantë” falë presidentit të Serbisë Aleksandar Vuçiq dhe anëtarit serb të Presidencës së Bosnjes dhe Hercegovinës, Millorad Dodik.
Bërnabiq ka përcjellë urimin e Vuçiqit ku, ndër të tjera, thotë se është shqetësuar nga vendosja e sanksioneve ndaj Dodikut.
“Serbia nuk do të vendosë kurrë sanksione kundër anëtarëve të popullit të saj në Bosnje dhe Hercegovinë dhe Republika Srpska”.
Presidentja e Republikës Srpska, Zheljka Cvijanoviq, me rastin e 30 vjetorit të këtij entiteti të Bosnjes dhe Hercegovinës ka ndarë dekorata për disa personalitete serbe përfshirë edhe kryeparlamentarn serb Ivica Daçiq dhe ambasadorin serb në SHBA Marko Gjuriq.
Ambasadori i Serbisë në Shtetet e Bashkuara, Marko Gjuriq, i cili më parë ka qenë drejtor i të ashtuquajturës Zyra për Kosovën në Qeverinë e Serbisë, ka thënë se përfaqësuesit e Serbisë ende nuk kanë biseduar me Millorad Dodik për sanksionet e fundit amerikane, duke theksuar se Serbia është gjithmonë me popullin e saj në Republikën Srpska.
“Dita e sotme u kushtohet ceremonive dhe festimeve, por Serbia është gjithmonë me popullin e saj në Republikën Srpska”, u tha Gjuriq gazetarëve në Banja Llukë pas ceremonisë së ndarjes së çmimeve.
