Vitia para gazetarëve ka thënë se vendimi  është marrë nga ministria e Shëndetësisë e Kosovës, në koordinim me dy kryetarët e komunave, shkruan lajmi.net.

“Sipas ligjit, është vetëm MSH ajo që mund të marrë vendime në raport me situatat e tilla. MSH ka qenë në koordinim me komunat përkatëse. Dhe në koordinim me to, është marrë vendimi nga ministria e Shëndetësisë. Dhe kjo është e vetmja  e vërtetë”, ka thënë  Vitia.

Vitia ka thënë se institucionet janë duke bërë të pamundurën që të izolohet përhapja e koronavirusit në të gjitha pjesët e Kosovës.

“Do të bëjmë çmos që të izolojmë përhapjen e koronavirusit në këto komuna. Janë marrë masat të cilat sipas protokollit janë të përcaktuara. Veprimet janë të përcaktuara nga udhëzimet që na vijnë nga OBSH-ja. Shpresojmë që të gjithë së bashku ta fitojmë këtë betejë sfiduese. Jemi në koordinim me kryetarët e komunave të Mitrovicës dhe Zveçanit. Do të koordinohemi edhe me komunat tjera”, ka thënë Vitia.

Tutje, ai shtoi se janë në dijeni për deklaratat që ai i quan politike, por që sipas tij të gjithë duhet të jenë solidarë, ngase armiku është i përbashkët.

“Jemi në dijeni për deklaratat e shumta edhe të karakterit politik, por po kërkoj sot që të jemi solidarë dhe të kemi mirëkuptim për njëri tjetrin. Kujdes nga komunikatat e pasaktësuara, ngase një minutë komunikatë mund ta rëndojë gjendjen në terren”, ka thënë Vitia.