Këshilltari i Kurtit pasi lexon aktgjykimin e plotë të Kushtetueses fyen rëndë gjyqtarët e saj

Këshilltari politik i kryeministrit Kurti dhe aktivisti i Vetëvendosjes, Elvis Hoxha, ka reaguar pas daljes në publik të aktgjykimit të Gjykatës Kushtetuese mbi dekretin e presidentit Thaçi. 

Hoxha nuk ka kursyer gjyqtarët e Kushtetueses duke i akuzuar ata për “paaftësi dhe pandershmëri në profesion” dhe ka thënë se për fajin e tyre po rrënohet “rendi kushtetues”, përcjell Periskopi.

Po ashtu, ai ka akuzuar gjyqtarët se kanë rrënuar edhe qëllimin kombëtar dhe historik të shtetit, e po ashtu edhe për prodhimin e një qeverie e cila sipas tij do të “shkëmbejë territore”, do të “rikthejë masivisht korrupsionin” e do të “amnistojë krimin masiv serb mbi shqiptarët”.

Postimi i plotë: 

Gjykata Kushtetuese rrënon Republikën duke keqtrajtuar kushtetutën dhe duke nxjerrë jashtë skenës popullin. Kushtetuta nis me fjalët: “Ne populli i Kosovës”, ndërsa GjK-ja punon me devizën: “Ne mercenarët e Presidentit”

Në aktgjykimin e Gjykatës Kushtetuese shohim shembullin e radhës së:
1. paaftësisë dhe pandershmërisë në profesion,
2. nëse deputetët janë të papërgjegjshëm dhe të paditur, kjo vjen sepse janë sjellë aty me votë, ndërsa gjyqtarët e GJK-së janë sjellë aty për hir të profesionalizmit,
2. fajet e gjyqtarëve të GjK-së shpien në rrënimin e rendit kushtetues,
3. për pasojë në rrënimin e qëllimit kombëtar dhe historik të shtetit,
4. në prodhimin e një qeverie me katër pika në PLAN: a. shkëmbimin e territoreve, b. rikthimin masiv të korrupsionit, c. heqjen e reciprocitetit, d. amnistinë e krimit masiv serb mbi shqiptarët për të shpëtuar prej gjykatës speciale vetëm një njeri.

Papërgjegjshmëri e plotë e GjK-së në dallimin mes njoftimit dhe aktgjykimit.
Durim Berisha nënvizon se:
në njoftim e vet, Gjykata Kushtetuese theksonte se ishte votuar me shumicë se dekreti i Presidentit është në përputhje me “…paragrafin 4 të nenit 95 të Kushtetutës”,
në dispozitivin e Aktgjykimit të dorëzuar sot, e paskan fshirë paragrafin 4 dhe paskan theksuar vetëm nenin 95.
Padija është nëna e korrupsionit dhe ati i inkriminimit.