Këshilltari i Osmanit: Ata që u frikësohen prokurorëve e gjykatësve që veprojnë me duart e lira kanë frikë nga Vettingu
Këshilltari i Presidentes së Kosovës, Vjosa Osmanit, Artan Murati përmes një postimi në rrjetin social Facebook bëri një reagim në lidhje me çështjen e Vettingut.
Ai tha se frikë nga Vettingu kanë ata që i frikësohen prokurorëve dhe gjykatësve që veprojnë me duart e lira, përcjell Klankosova.tv.
“Frikë nga vetingu kanë ata që i frikësohen prokurorëve dhe gjykatësve që veprojnë me duart e lira dhe pa instruksione nga grupet joformale politike e ekonomike. Presidentja Osmani është e vendosur në çlirimin e prokurorëve dhe gjyqtarëve nga këto kufizime që janë bërë barrë e padurueshme e padrejtësisë në Kosovë”.
“Nga raportet e Komisionit Evropian të cilat ndër vite e patën “kapjen e shtetit” si kryefjalë e deri tek raportet ku si shqetësim evidentohet nevoja për veting ose jo, ka progres e sukses të madh. Po që se shefi i Grupit Parlamentar të PDK-së, në kohën kur ishte ministër i Drejtësisë apo edhe kolegu i tij nga AAK-ja, po ashtu ish-ministër i Drejtësisë, do të ishin angazhuar për shfrytëzim të vërtetë të mekanizmave eksiztues për luftimin e krimit e korrupsionit, kjo dilemë do ishte shuar me kohë.Për mungesë të veprimeve të tyre, e për më tepër, duke lejuar dobësimin e këtyre institucioneve përmes korrupsionit dhe intervenimeve politike, vetingu pastaj bëhet i domosdoshëm”, u shpreh Murati.
