Këto janë ushqimet e preferuara të futbollistëve, nuk mungojnë orizi, hudhrat e llazanja

Në një botë paralele me atë të futbollit, në kohët e futbollit modern ecën edhe ajo kulinare. Shijet e futbollistëve ndryshojnë siç ndodh me rolet e secilit prej tyre në fushën e lojës, ndaj edhe në tryezë secili ka shijet e veta.

Pjatat e preferuara të kampionëve dhurojnë një larmi të madhe, shpesh një gjetje fantastike dhe shumë e veçantë, siç mund të jetë një goditje, e cila mund të zgjidhë një ndeshje të vështirë.

Në shumë pjata mund të ndikojë tradita, në shumë të tjera shija, apo edhe përzierja e kalorive që i nevojiten një sportisti të kohëve të sotme, që të japë rendimentin e duhur, aq më tepër kur më poshtë listohen emra të shumë kampionëve të mëdhenj, siç mund të jenë Bufon, Luis Suarez, Ramos, Gareth Bale, Manuel Neuer, Tomas Muller, por pa dyshim edhe Leo Mesi, Neymar dhe Cristiano Ronaldo.

MARIO BALOTELI
Shëtiti botën në kërkim të afirmimit, por nga Italia nuk u nda kurrë në aspektin e shijeve. I rikthyer te Bresha, sulmuesi mund të shijojë pjatën e preferuar që janë picat. Si italian, çfarë mund të përzgjidhte tjetër?

XHANLUIXHI BUFON
“Konsumoj gjithçka, por pasta alla karbonara është e preferuara ime. Duhet të kem dikë pranë që të mos e teproj” deklaronte veterani i portës së Juves pak kohë më parë.

LUIS SUAREZ
I shënoi Interit në Champions, pasi si duket lidhja me Milanon është e fortë për shkak edhe të kotoletës milaneze, për të cilën uruguaiani “çmendet”.

SERXHO RAMOS
Gjithnjë kërcen më lart se të gjithë. Mbase për shkak të pulës me salcë të cilën e konsumon shpesh. Te Reali nuk mund të shkelësh rregullat e ushqimit, por për kapitenin përjashtimi është i justifikuar.

DIDIE DROGBA
Gjermanët i bënë një këngë Luka Tonit duke nënvizuar pasionin e tij për kanelonët. Ja që sulmuesi pëlqen makaronat me djathë nga të cilat nuk ka hequr dorë për asnjë moment gjatë karrierës që e pa të shpallej edhe kampion bote në vitin 2006.

KARIM BENZEMA
Algjerinë e ka tradhtuar për futbollin, por jo për kuzhinën. Sulmuesi i Realit vazhdon të adhurojë kuskusin, një pjatë tipikë e vendit të origjinës.

GARET BEJL
Futbollistët kanë rregulla të cilat edhe Garet Bejl si shokët e tij nuk i shkel, megjithatë kur është me pushime thuhet se konsumon shumë vezë me patatina.

MESUT OZIL
I rritur në Gjermani, nuk ka pranuar të heqë dorë nga kuzhina turke, sidomos për vaktin e parë të ditës kur ai konsumon Menemen, një pjatë tipikë me vezë, qepë, domate, speca, suxhuk dhe erëza. Mëngjes i bollshëm, e të mendosh se shoqërohet me bukë.

SERXHO AGUERO
Peshku me patate është pjata e preferuar e argjentinasit, i cili në Angli ka mësuar edhe zakonet e tryezës.

CESK FABREGAS
Spanjolli pëlqen të brendshmet e deles ose salçicet me oriz të skuqur. Të pandashme këto pjata për Fabregas, i cili, gjithsesi ka si ushqim të preferuar Mombarin, një pjatë arabe hiperkalorike.

HERRI KEJN
Tepër strikt në profesion, Kejn nuk e tepron kurrë, aq sa si ushqim të preferuar ka kosin me arra dhe fara.

MOHAMED SALAH
Shumë i lidhur me tokën e tij, egjiptiani çmendet për Kusharin, një pjatë ku përfshihet orizi, makarona, thjerrëzat, qiqrat dhe një varietet hudhre egjiptiane.

MANUEL NOJER
Si çdo gjerman tipik adhuron ushqimet me patate. Petullat e patates shoqëruar me salmon dhe sallatë janë preferenca e kapitenit të Bajernit.

NEJMAR
Orizi me fasule, patate dhe mish është pjata më e dashur për brazilianin që nuk mund ta konsumojë sa herë të dojë për shkak të profesionit.

LIONEL MESI

Tashmë që është vegjetarian nuk dihet çfarë konsumon me më shumë dëshirë, por për sa kohë i hante të gjitha, “Pleshti” pëlqente kotoletat milaneze me salcë, proshutë dhe djathë. Ky pasion i kishte lindur në restorantin “El Napolitano” në Argjentinë.

FRENK RIBERI
Edhe veterani i Fiorentinës adhuron Kuskusin, por edhe çdo ushqim tjetër arab.

KRISTIANO RONALDO
Strikt në regjimin e tij, portugezi preferon merlucin në skarë. Nëse shoqërohet me patate, vezë dhe qepë të skuqura akoma më mirë, teksa ullinjtë e zinj nuk duhet të mungojnë në servirjen e kësaj pjate.

DANIELE DE ROSI
Thonë se në Argjentinë eksperimentoi shumë me ushqimin, megjithatë në zemrën e De Rosit asnjë pjatë nuk mund të zërë vendin e sallatës katalanase me karkaleca, pomodorini dhe rukola.

GONZALO HIGUAIN
Napoli i ka lënë aq shumë gjurmë, sa për bomberin e Juves nuk ka asgjë më të mirë se pica.

LEONARDO BONUÇI
Mbrojtësi bardhezi është i dhënë pas ëmbëlsirave, ku tiramisuja mban vendin e parë. Sidomos kur ia përgatit bashkëshortja.

MILAN SHKRINIAR
Nuk dihet nëse Antonio Konte e lejon t’i konsumojë, por sllovaku raportohet si shumë i pasionuar pas lazanjës.

SADIO MANE
Shpejtësia dhe zbritjet e tij nuk janë rastësi. Është mësuar ta bëjë diçka të tillë edhe nëpër rrugët e Liverpulit në kërkim të restoranteve ku shërbehet salmon. I tymosur, i marinuar pak rëndësi ka.

TOMAS MYLER
Vështirë që të ndahet nga Bavaria. Sulmuesi adhuron sanduiçin me Leberkeze, një lloj sallami shumë i konsumuar brenda kufijve teutonë.