Konfirmohet: Kosova luan dy miqësore në mars

Kryetari i Federatës së Futbollit të Kosovës (FFK), Agim Ademi, ka njoftuar të mërkurën për KOHËN se Përfaqësuesja e Kosovës do t’i ketë dy ndeshje miqësore në muajin mars të vitit të ardhshëm.

Ademi ka theksuar se një ndeshje do ta zhvillojnë në stadiumin “Fadil Vokrri” në Prishtinë dhe një tjetër jashtë vendit. Dy ndeshjet miqësore Ademi thotë se do të drejtohen nga përzgjedhësi i ri i Kosovës, emrin e të cilit ka thënë se do ta bëjë të ditur para se të caktohen kundërshtarët e “Dardanëve”, transmeton Periskopi.

“Sigurisht se jemi duke punuar për të gjetur dy kundërshtarë për muajin mars, por ende nuk janë definuar të gjitha detajet.

”Megjithatë, mund të konfirmoj se janë dy ndeshje miqësore që planifikojmë t’i zhvillojmë në mars, në mënyrë që selektori i ri ta shohë ekipin nga afër para se të nisim ciklin e ri të Ligës së Kombeve”, ka thënë Ademi të mërkurën për gazetën e lartëpërmendur. /Periskopi.com/