Kosova sot mëson kundërshtarët e grupit në kualifikimet për Kampionatin Botëror

Rruga drejt kampionatit botëror të hendbollit të femrave, “Spanja 2021” do të fillojë sot (e mërkurë) kur tërhiqet shorti për fazën e parë të kualifikimeve evropiane.

Në short është edhe Kombëtarja e Kosovës që synon kalimin në raundin tjetër. Në kombëtaren e Kosovës është rritur ndjeshëm konkurrenca në vitet e fundit dhe rrjedhimisht është rritur cilësia. Vendi i parë apo i dytë, që dërgojnë tutje, është synim i kombëtares.

Natyrisht shumë do të varet nga shorti, ndërsa në kualifikime paraqiten kombëtare me nivel serioz dhe nuk do të jetë e lehtë. Shorti tërhiqet prej orës 15:00 në Vjenë. Dhjetë kombëtare, nga dy prej të gjitha pesë grupeve, kalojnë tutje.

Do të formohen dy grupe me nga katër ekipe dhe tri grupe me nga tri ekipe. Ndarja nëpër vazo e kombëtareve është bërë në bazë të ranglistës së kombëtareve të hendbollisteve që ishte e vlefshme për “Euro 2020”.

Të rikujtojmë se Kosova është përballur me sukses edhe me kombëtare nga vazoja e parë, ndonëse nuk ka qenë e kompletuar. Ndeshjet do të luhen në formë turneu në një vend. EHF-ja ka përcaktuar dy terminë për këto ndeshje: 27-29 nëntor apo 4-6 dhjetor. Dy të parët në grup kualifikohen për fazën e dytë, ku zhvillohen ndeshje plejofi. Faza e dytë është më 16 e 21 prill 2021.

Vazoja 1: Austria, Bjellorusia, Sllovakia, Turqia, Maqedonia e Veriut
Vazoja 2: Ukraina, Italia, Zvicra, Islanda, Portugalia
Vazoja 3: Lituania, Ishujt Faroe, Kosova, Izraeli, Finlanda
Vazoja 4: Greqia, Luksemburgu