Kur do të ndodh takimi i ardhshëm në Bruksel? Ja si përgjigjet Thaçi

Presidenti i Kosovës Hashim Thaçi e ka quajtur takim jo të lehtë, takimin me presidentin serb Aleksandar Vuçiq, të enjten në Bruksel.

Ai ka thënë se në dialog nuk do të lejohen ultimatume e as zëra agresivë nga Serbia.

Sa i përket një takimi të ardhshëm, Thaçi ka thënë se kjo do të ndodhë në një të ardhme jo të largët pa specifikuar afat kohor. Ka shtuar se kjo i takon përfaqësueses së lartë të BE-së, Mogherinit.

Ai ka thënë se duhet që skena politike e Kosovës të bashkohet e të jenë pjesë e arritjes së një marrëveshjeje gjithëpërfshirëse ligjërisht obliguese.

“Është mundësi e vogël për marrëveshje, por duhet të vazhdojmë. Diskursi ishte agresiv dhe arrogant nga Serbia dhe delegacioni serb. Diskursi ynë ishte i argumenteve dhe anës së drejtë për arritjen e një marrëveshjeje të balancuar”, ka thënë Thaçi më tej.

Sipas Thaçit, një marrëveshje përfundimtare gjithëpërfshirëse është rruga e duhur për të dy vendet.

“Klima nuk është e mirë, por dialogu e marrëveshja janë rruga e vetme. Jam me shpresë se pas shumë gjembave do të ketë një marrëveshje përfundimtare”, ka shtuar Thaçi.