Kurti bën fushatë në vend të Arben Vitisë në Prishtinë
Lëvizja Vetëvendosje ka publikuar fotografi të takimit të kryetarit të VV-së Albin Kurti me kandidatët për asambleistë në komunën e Prishtinës, nga kjo parti.
Në këtë takim, nuk ka qenë prezent vet kandidati për kryetar të Prishtinës, z.Arben Vitia, i cili ka deklaruar në një nga emisionet e fundit televizive se ‘derisa të jetë në punën e ministrit të Shëndetësisë, nuk do të merret me fushatën në Prishtinë’.
“Projektet e Kryetarit Vitia dhe të qeverisë Kurti përputhen prandaj ndryshimi në kryeqytet me Arbenin përveç se do të jetë i shpejtë do të jetë edhe përmbajtësor”, njofton VV-ja.
Mungesa e Vitisë në fushatë, ishte paralajmëruar edhe nga mediat që thirreshin në burime brenda partisë së Kurtit, se do të ishte strategji e partisë në pushtet, duke qenë se gjendja me pandeminë, ka bërë që VV (sidomos në Prishtinë) të bie në sondazhe.