Kush po e thotë të vërtetën për FSK-në, Demolli apo Veseli ?

Këto deklarata Veseli i ka bërë sot në një vizitë që i bëri Kazermës së FSK-së në Mitrovicë, ku takoi pjesëtarët e Brigadës së Reagimit të Shpejtë, të cilat ditë më parë fituan medaljen e artë në garën ushtarake, më sfiduese dhe më prestigjioze në botë “Cambrain Patrol”, të mbajtur në Britani të Madhe, transmeton Periskopi.

“FSK-ja është gati dhe shpejt do të bëhet Ushtria e Kosovës. Ushtria e Kosovës është element i domosdoshëm në arkitekturën e sigurisë nacionale, rajonale dhe më gjerë. Shpejt do ta kemi këtë ushtri, partnere të denjë të Aleancës Veriatlantike, emblemë krenare të Kosovës së zhvilluar dhe të integruar në Bashkimin Evropian”, theksoi kryeparlamentari Veseli.

Edhe pse Veseli vlerëson se  FSK-ja shumë shpejtë do të shndërrohet në ushtri, sipas Ministritë të FSK-së,  Haki Demolli kjo nuk do të ndodh edhe 10 vjet.

Këto deklarata ai i ka bërë gjatë raportimit të tij në Komisionin për Punë të Jashtme në Kuvendin e Kosovës. Demolli tha se gjatë kësaj periudhe është paraparë që edhe numri i pjesëtarëve të FSK-së të arrij në rreth 5 mijë nga 2 mijë e 500 sa është tani.

Ndërsa, Veseli  ka shtuar se FSK-ja është shembulli më i mirë që tregon se Kosova gjithmonë ka ecur përpara, duke qëndruar fuqishëm në partneritet me Shtetet e Bashkuara të Amerikës, vendet e Bashkimit Evropian dhe mbarë botën demokratike. Veseli tha se ky partneritet u rrit në ditët e Ushtrisë Çlirimtare të Kosovës dhe përgjithmonë do të mbetet vlerë themelore e popullit dhe shtetit tonë të pavarur e sovran.

Ai shtoi se kjo skuadër e shkëlqyeshme është drejtuar nga nëntogeri Ismail Hoxha, i cili vitin e kaluar u shpall kadeti më i mirë në Akademinë Ushtarake të Londrës, në mesin e kadetëve nga 30 shtete të botës./Periskopi/