Ministri Mehaj e merr me të mirë ish-komandantin e FSK-së: E pret në takim pas dorëheqjes

Periskopi.com Lajme

Pas dorëheqjes së Rrahman Ramës nga pozita e komandantit të Forcës së Sigurisë së Kosovës (FSK), ministri i Mbrojtjes, Armend Mehaj priti në takim. Për çka Mehaj shprehu mirënjohje dhe vlerësim të lartë për kontributin e tij.

Pas takimit me Ramën, Mehaj theksoi edhe se eksperienca e madhe profesionale dhe lidershpit ushtarak të Gjeneral Ramës do të jetë i rëndësishëm për diplomacinë ne mbrojtjes dhe sigurisë në detyrën e re në RACIVIAC.

“Pas lirimit nga detyra e Komandantit të FSK-së, sot në zyrën time prita Gjeneral Rrahman Ramën. Me këtë rast, në emri tim dhe të gjithë zyrtarëve dhe ushtarakëve të Ministrisë së Mbrojtjes dhe FSK-së, i shpreha mirënjohjen dhe vlerësimin më të lartë për kontributin dhe lidershipin e lartë të treguar gjatë shërbimit si Komandant i FSK-së. Njëherit i shpreha falënderimin për bashkëpunimin dhe koordinimin e ngushtë përgjatë periudhës tetëmujore të punës së përbashkët. Eksperienca e madhe profesionale dhe lidershipit ushtarak të Gjeneral Ramës do të jetë shumë e rëndësishme për diplomacinë tonë të mbrojtjes dhe sigurisë në detyrën e re në RACVIAC”, ka shkruar Mehaj.

Ndërkohë që të martën, Rama ofroi dorëheqje nga pozita e Komandatint të FSK-së, e që në vend të tij Presidentja e Kosovës, Vjosa Osmani ka emëruar Bashkim Jashari, që është i biri i Rifat Jasharit.

Përkundër vlerësimi ndaj Jasharit, dorëheqja e Ramës nxiti edhe kritika.

Ish-ambasadorja e Kosovës në Shtetet e Bashkuara të Amerikës (ShBA), njëherit edhe nënkryetare e Partisë Demokratike të Kosovës (PDK), Vlora Çitaku nëpërmjet një statusi tha se Gjeneral Rama ka merituar të përcillet me nderime e ceremoni, sikurse që Gjeneral Jashari të pranojë detyrën me ceremoni shtetërore.

“Ajo çfarë ka ndodhur javëve të fundit me FSK-në nuk duhet të normalizohet. Ministri Mehaj ka bërë shkelje të rëndë edhe të ligjit, po edhe të marrëveshjes me SHBA-të, duke kërkuar nga Komandanti i FSK-së që t’i japë asetet e FSK-së për shfrytëzim në operacione policore. Me veprime të tilla cënohet rëndë kredibiliteti i FSK-së si partnere dhe aleate. Reagimi nga SHBA-të ka qenë i ashpër dhe i menjëhershēm. Në vend se të dekorohet, Gjeneral Rama dorëhiqet, pak pa e përmbyllur mandatin. Gjeneral Jasharajt i dëshiroj sukese dhe mbarësi. Besoj fuqishëm se edhe komandanti i ri i ushtrisë do ta ruaj integritetin e FSK-së. Jam e bindur se do të dalë faqebardhë. Në fund fare, shteti është edhe ceremoni dhe simbolika. Gjeneral Rama e ka merituar të përcillet me nderime dhe ceremoni, sikurse që Gjeneral Jashari e ka merituar ta pranojë detyrën me ceremonitë që i takojnë një emërimi të tillë”, ka shkruar Çitaku.