Molliqaj: Sot kush nuk e mbronë UÇK-në, është kundër UÇK-së
Kryetari i PSD-së, Dardan Molliqaj ka reaguar për herë të parë pas arrestimit të dhunshëm që iu bë sot nga Policia e Kosovës në një aksion tek konferenca e kryetares së Speciales, Ekaterina Trendafilova.
Molliqaj me anë të një postimi në Facebook, Molliqaj ka thënë se nëse sot nuk e mbron UÇK-në, atëherë je rreshtuar kundër saj.
“Kur nuk e mbron UÇK-në, tashmë je rreshtuar. Ke marrë pozicion, kundër UÇK-së. Prandaj i arreston ata që e mbrojnë. Prandaj i mbron, i ngritë lartë, e u jep pozita atyre që e luftojnë”, ka thënë ai.
Madje sipas tij, pushteti i Kurtit u ka dhënë zemër fraksioneve brenda policisë që janë kundër UÇK-së të sillen dhunshëm ndaj kujtdo që është kundër qeverisë.
“Sot mbrojtja e UÇK-së është detyrë e kohës. Është detyrë e secilit. Është detyrë që do të kryhet, pavarësisht çfarë dhune nxjerrë pushteti përballë”, ka shkruar ai.
Postimi i plotë i tij:
MBROJTJA E UÇK-SË ËSHTË DETYRË E KOHËS
Sot kur ndaj UÇK-së po bëhet luftë speciale, jashtë e brenda vendit, mbrojtja e saj është detyrë e kohës. Është mbrojtje e shtetit të Kosovës. Sepse nuk qëndron dot, e fortë dhe e sigurt, një ndërtesë që ia gërryejnë themelin.
Kur nuk e mbron UÇK-në, tashmë je rreshtuar. Ke marrë pozicion, kundër UÇK-së. Prandaj i arreston ata që e mbrojnë. Prandaj i mbron, i ngritë lartë, e u jep pozita atyre që e luftojnë.
Ndërkaq dhuna ndaj nesh, nuk është thjeshtë dhunë ndaj nesh. Është dhunë e mosdurimit të pushtetit sa herë që i shpaloset pozicioni i tij i gabuar.
Po ky pushtet, me këtë mënyrë të të menduarit, u ka dhënë zemër fraksioneve brenda policisë që janë kundër UÇK-së. U ka dhënë zemër të sillen dhunshëm ndaj kujtdo që është kundër qeverisë. Prandaj dhuna e shfrenuar.
Sot mbrojtja e UÇK-së është detyrë e kohës. Është detyrë e secilit. Është detyrë që do të kryhet, pavarësisht çfarë dhune nxjerrë pushteti përballë.