Nurellari: Katër mashtrimet kryesore të katër minutave të videos së Kurtit

Analisti Adri Nurellari, ka thënë se kryeministri i shkarkuar Albin Kurti në videon paraqitjen e mbrëmshme ka gënjyer haptazi.

Sipas Nurellarit, Kurti ka mashtruar në katër raste, për 4 minuta sa zgjati fjalimi i tij.

Postimi i Adri Nurellarit:

Katër mashtrimet kryesore të katër minutave të videos së Kurtit

Në monologun e recituar në videon e djeshme, kryeministri në largim u përpoq që të kompensonte mungesën e tij nga debatet e hapur javës së fundit duke folur tërë marraz e tone të ndezura për disa çështje njëherazi si dhe duke gënjyer haptazi. Ja disa nga mashtrimet kryesore të video-spotit të tij të mbrëmshëm:

Së pari mashtroi kur tha se vendimin për karantinimin e dy komunave veriore të Kosovës e ka marrë Prishtina. Faktikish qeveria e tij vetëm sa i është gjunjëuar vendimit të marrë më herët nga strukturat paralele. I pafuqishëm për ta kundërshtuar vendimin e Beogradit për karantinimin e dy komunave të veriut të Kosovës për të cilin u njoftuam nga mediat serbe te premnte ai dje u përpoq ta mbulojë kinse ishte vendim i ministrisë së Shëndetësisë së Kosovës. Po të mos kishte reaguar opozita, me siguri as nuk do e kishin bërë fare këtë përpjekje për maskim. Mirëpo kryeministri në ikje Kurti duhet të na sqarojë a është gjithashtu vendim i ministrisë së tij të shëndetësisë imponimi i orës policore të Serbisë në komunat e veriut prej disa javësh, orar ky që është krejt ndryshe nga ora policore në pjesën tjetër të Kosovës.

Së dyti mashtroi kur tha se nuk duhen bërë dallime etnike në luftën kundër pandemisë. Gjatë videos së tij ai tha se ne kemi një të vdekur dhe nuk e llogarit aspak si shtetasin kosovar me përkatësi etnike serbe nga Leposaviqi që vdiq prej koronavirusit. Pra nëse Albini me të vërtetë e konsideron veriun pjesë të Kosovës, atëhere ai mbrëmë duhej të thoshte dy të vdekur, shtetasi 82 vjeçar nga Dumnica e Podujevës dhe 47 vjeçari nga Brusi i Leposaviqit.

Së treti mashtroi kur tha se Kosova ka numër rekord të testimeve kur krahasimisht kur faktikisht ka një ndër numrat më të ulëta të rajonit tonë. Në Ballkan rekordin e mban Sllovenia me 11127 teste për 1 milion banorë për të vijuar mandej me Kroacinë, Maqedoninë e Veriut Greqinë e kështu me radhë. Kosova është në fund të listës me 1022 teste për 1 milionë duke lënë pas vetëm Serbinë dhe Shqipërinë me një distancë të vogël.

Së katërti mashtroi kur tha se qeveria e tij në detyrë po kujdeset për qytetarët pa dallim etnie e komune. Tashmë e kanë pranuar vetë edhe zyrtarët e qeverisë së tij të shkarkuar, se kanë hyrë qindra mjekë, infermierë dhe stafe mbështetëse serbe të drejtuar në Beogradi të cilët janë në të gjitha komunat me shumicë serbe në Kosovë duke u kujdesur ata për shtetasit tanë me etni serbe. Pra janë autoritetet shtetërore të Beogradit të lejuara nga qeveria në ikje e Prishtinës ato që po merren me testimin izolimin dhe trajtimin e qytetarëve kosovarë të përkatësisë serbe. Jo vetëm kaq por janë këto autoritete serbe të cilat i kanë çuar madje të kurohen në Nish e jo në spitalet e Kosovës.