Papa Françesku takohet me kryeministrin Viktor Orban në Hungari, kritikon veprimet e këtij të fundit

Papa Françesku ka vizituar Hungarinë në daljen e parë në një vend të huaj, që kur iu nënshtrua një operacioni të zorrëve në korrik, ku takoi udhëheqësin e krahut të djathtë, Viktor Orban.

Papa mbajti meshë në “Sheshin e Heronjve të Budapestit”, për të shënuar fundin e një konference të madhe katolike që po zhvillohej në qytet, duke u bërë thirrje kongregacioneve të hapnin krahët për të gjithë, duke kritikuar dukshëm kryeministrin Orban për politikat e migrimit.

Ai gjithashtu u takua me figurat fetare hungareze dhe udhëheqësit politikë të vendit gjatë një ndalese të shkurtër, para qëndrimit të tij katër ditor në Sllovaki.

Kreu i Vatikanit dhe Kryeministri i Hungarisë nuk pajtohen për një mori çështjesh, përfshirë migrimin, dhe koha e kufizuar e Francis në Budapest mund të tregojë se ai nuk donte t’i jepte qeverisë së Orban përparësinë politike për ta pritur atë për një pelegrinazh më të gjatë, para zgjedhjeve të përgjithshme të vitit të ardhshëm.

Orban e ka përshkruar shpesh qeverinë e tij si një mbrojtës të qytetërimit të krishterë në Evropë dhe një mbrojtje kundër migrimit nga vendet me shumicë myslimane, shkruan Guardian, transmeton Klankosova.tv.

Françesku ka shprehur solidaritetin me emigrantët dhe refugjatët dhe kritikoi atë që ai e quajti “populizëm kombëtar” të avancuar nga qeveria e Hungarisë.

“Ndjenja fetare ka qenë gjaku i këtij kombi, aq i lidhur me rrënjët e tij. Megjithatë, kryqi, i mbjellë në tokë, jo vetëm që na fton të jemi të rrënjosur mirë, por gjithashtu ngre dhe shtrin krahët drejt të gjithëve”, u tha Françesku hungarezëve.