Pasi paralajmëroi rrëzimin e Qeverisë, Mustafa nis takimet me ndërkombëtarët
Kryetari i LDK-së, Isa Mustafa gjatë ditës së sotme është takuar me Përfaqësuesen e Posaçme të BE-së dhe Shefe e Zyrës së BE-së në Kosovë, Nataliya Apostolova – shkruan Periskopi.
Në një njoftim për media u bë e ditur se temë diskutimi ishte situata aktuale politike në Kosovë.
Mustafa e njoftoi Apostolovën për qëndrimet e LDK-së për proceset në të cilat po kalon Kosova.
Gjithashtu Mustafa e falënderoi BE-në për mbështetjen e vazhdueshme që i kanë dhënë Kosovës në të gjitha proceset shtetformuese.
Apostolova falënderoi kryetarin Mustafa për mikpritjen dhe inkurajoi LDK-në të vazhdojë të ketë rol konstruktiv në zhvillimin e vazhdueshëm të Kosovës.
Mustafa gjatë ditës së djeshme paralajmëroi se këtë javë do t’i intensifikojë punët për rrëzimin e Qeverisë, në bashkëpunim me dy partitë tjera opozitare./PERISKOPI
