Periskopi mëson detaje sensacionale: Rashica te Liverpooli për vetëm 15 milionë, vjen oferta zyrtare

Periskopi mëson detaje sensacionale: Rashica te Liverpooli për vetëm 15 milionë, vjen oferta zyrtare

E ardhmja e Milot Rashicës ka qenë një prej temave më të diskutuar së fundmi nëpër mediet vendore dhe jo vetëm.

Duket gati e sigurtë se ylli i Kombëtares së Kosovës do të largohet në verë nga Werder Bremeni, skuadër e cila po lufton për mbijetesë në Bundesligë, shkruan Periskopi.

Ish-ylli i Vushtrrisë ka kontratë me skuadrën nga Bremeni deri më 30 qershor të vitit 2022, por largimi i tij duket i pashmangshëm, me Werderin që është shumë afër të përshëndetet nga elita e futbollit gjerman.

Kur kanë mbetur edhe gjashtë javë për t’u luajtur, djelmoshat e Florian Kohfeldt aktualisht pozicionohen në vendin e parafundit në tabelë me vetëm 25 pikë.

Sidoqoftë, pavarësisht kësaj, Rashica do të ketë mjaft opsione mbi tavolinë për të zgjedhur aventurën e radhës.

Periskopi ka mësuar nga një burim i sigurtë se tri oferta zyrtare janë bërë për 23-vjeçarin.

Këto tri oferta kanë ardhur nga klube si Liverpooli, Borussia Dortmundi dhe Leipzigu.

I njëjti burim për Redaksinë e Periskopit ka zbuluar edhe një detaj të bujshëm, duke thënë se Rashica mund të largohet për vetëm 15 milionë euro nga “Weser Stadium.”

“Në kontratën e Milotit është një klauzolë që thotë se nëse Werderi bie nga Bundesliga, vlera e tij ulet në 15 milionë euro, ndërsa nëse qëndron në elitë, çmimi i tij është 35 milionë,” ka thënë burimi për Periskopin.

Për më tepër, ai ka thënë se ka pasur klube nga Anglia, Gjermania e Italia që janë interesuar për Rashicën, teksa ka zbuluar se janë bërë tri oferta zyrtare nga klube si Liverpooli, Borussia Dortmundi dhe Leipzigu.

“Liverpooli, Leipzigu dhe Dortmundi kanë bërë oferta. Nuk ka garancion se ai do të aktivizohej rregullisht te këto klube, por ky është futbolli, varet edhe nga trajneri dhe sistemi që luajnë.”

I pyetur cili është destinacioni i preferuar i lojtarit, i njëjti burim ka shtuar:

“Këto klube që flasim ne, janë klube të mëdha nga ligat më të forta të botës. Futbolli gjerman dhe anglez më së shumti i përshtaten Milotit.”

Këtë edicion, në 24 paraqitje në Bundesligë, Rashica ka kontribuar me shtatë gola dhe pesë asistime, ndërsa në Kupë ka realizuar tri gola dhe një asistim në katër paraqitje. /Periskopi.com/

Shpërndaje në: