Petkoviq: Bisedimet janë rënduar nga kërkesa e Prishtinës për anëtarësim në KiE

Periskopi.com Lajme

Kryenegociatori i Serbisë, Petar Petkoviq, ka thënë se sot nuk është takuar me kryenegociatorin kosovar, Besnik Bislimi, pasi, sipas tij, ai ka refuzuar të diskutojë për Asociacionin e Komunave me Shumicë Serbe dhe çështjen e personave të pagjetur.

Drejtori i të ashtuquajturës Zyra për Kosovë në Qeverinë e Serbisë ka thënë se bisedimet e sotme në Bruksel janë rënduar me vendimin, që ata e cilësojnë të paligjshëm, të Prishtinës për të aplikuar për anëtarësim në Këshillin e Evropës.

“E shfrytëzova këtë moment edhe për të protestuar fuqishëm kundër vendimit të paligjshëm dhe të njëanshëm të Prishtinës”, u tha Petkoviq gazetarëve pas takimit, shkruan Tanjug, transmeton Klankosova.tv.

Se nuk ka pasur një takim trepalësh mes kryenegociatorit kosovar, atij serb dhe Përfaqësuesit Special të BE-së për Dialogun, Miroslav Lajçak, e ka konfirmuar edhe Besnik Bislimi.

Ai tha se pala serbe ka dashur që në agjendë të futet edhe tema për Asociacionin e Komunave me Shumicë Serbe, gjë të cilën thotë se s’e ka pranuar.

“Unë kam kërkuar takim trepalësh, por si duket në momentin kur pala serbe është konfrontuar me këtë kërkesë, i ka ardhur një intervenim nga Serbia. Ata kanë dashur ta keqpërdorin këtë dhe ta fusin një temë të re në agjendë dhe kanë thënë se mund të ndodhë takimi trepalësh nëse fillimisht bisedohet për Asociacionin e Komunave Serbe, ku natyrisht nuk kemi mundur të pranojmë për arsye se agjenda ka qenë e paracaktuar”.