Prokuroria kërkon paraburgim për 22-vjeçaren që plagosi Princ Corleonen
Prokuroria Themelore e Gjilanit njofton se ka ushtruar kërkesë në gjykatën kompetente për caktimin e masës së paraburgimit ndaj Anita Sylës, vajzës 22-vjeçe, e dyshuar për plagosjen e Prince Valentino Corleone.
E njëjta po dyshohet për dy vepra penale: Vrasje në tentativë dhe Mbajtja në pronësi, kontroll ose posedim të paautorizuar të armëve.
Corleone ka pësuar plagë në këmbën e djathtë nga arma e zjarrit dhe i njëjti është dërguar për trajtim mjekësor në spitalin e përgjithshëm të Gjilanit, ndërsa pak më parë ai është liruar nga ky spital.
Njoftimi i plotë i prokurorisë:
Me datë 11.08.2022, Prokuroria Themelore ne Gjilan, ka ndaluar për 48 orë të dyshuarën A.S nga Gjilani, për shkak të dyshimit të bazuar se e njëjta ka kryer dy vepra penale dhe atë : Vrasje në tentativë nga neni 172 lidhur me nenin 28 të KPRK-së dhe veprës penale Mbajtja në pronësi, kontroll ose posedim të paautorizuar të armëve nga neni 366 të KPRK-së.
Lidhur me këtë rast, Prokurori i Shtetit, ka filluar hetimet dhe njëherit brenda afatit ligjor ka ushtruar kërkesë për caktimin e paraburgimit pranë Gjykatës Themelore në Gjilan.
