Për organizimin e tyre njohës të procesit zgjedhor thanë se ekzistojnë dy mënyra -njëra nëpërmjet dorëheqjes me marrëveshje politike të kryetarëve të zgjedhur në votimet e 23 prillit dhe e dyta me anë të një kërkese të bërë nga votuesit në këto komuna.

“Në kuptimin politik mbase do të ishte më mirë të ndiqej kjo forma e demokracisë së drejtpërdrejtë për shkak se do të kishte edhe një lloj garancie që serbët do të marrin pjesë në proces zgjedhor. Pra, vetëm në rast se ata do të dilnin mbi 50 për qind në minireferendum do të mund të hapej rruga për shpalljen e zgjedhjeve të jashtëzakonshme, problemi me këtë modalitët qëndron të kostoja e dyfishtë kohëzgjatja e dyfishtë”, tha Cakolli.

Shqyrtimi i kërkesës eventuale të serbëve për mbajtjen e zgjedhjeve është paralajmëruar edhe nga kryeministri Albin Kurti, në një intervistë për KTV-në.

“Asnjëherë duke shkelur çfarë ligji apo rregullin në Kosovë është KQZ-ja, është zonja presidente, është Kuvendi i Republikës, është Qeveria. Si aktivist politik unë e paramendoj situatën, serbët do të dalin në protesta për zgjedhje të parakohshme, paqësore për zgjedhje të parakohshme, do ta kenë një dëgjues të mirë prej kryeministrit të Kosovës”, tha Kurti.

E në përkrahje të kërkesës së liderëve evropianë doli të premten edhe ministri i Jashtëm i Maqedonisë së Veriut, Bujar Osmani, që e mban kryesimin e misionit të OSBE-së.

“I bashkohem thirrjes për zgjedhje të reja dhe rikthimin e serbëve të Kosovës në institucione dhe zbatimin e plotë të marrëveshjeve, përfshirë asaj të fundit në Ohër. Si kryesues i OSBE-së e përkrah dialogun e udhëhequr nga BE-ja, si mënyrën e vetme për t’i ulur tensionet dhe për të siguruar stabilitet afatgjatë. OSBE-ja është e gatshme të ndihmojë”, deklaroi Osmani.

KOHA i ka adresuar pyetje Zyrës së Kryeministrit lidhur me çështjen, porse gjatë ditës nuk ka pranuar përgjigje.