Qeveria u kritikua nga Raporti i Progresit, Kurti: Për gjashtë muaj shkatërruam 29 grupe kriminale

Periskopi.com Lajme

Kryeministri i Kosovës, Albin Kurti, ka pranuar sot nga shefi i zyrës së BE-së në Kosovë, Tomas Szunyog, raportin e progresit të Komisionit Europian.

Lidhur me këtë, në një adresim të përbashkët për media, Kurti tha se për këto gjashtë muaj qeverisje, vendit iu është referuar stabilitet institucional dhe besueshmëri nga qytetarët për të cilën ua kanë zilinë të gjitha vendet e rajonit.

”Në këta gjashtë muaj të qeverisë kemi stabilitet institucional, legjitimitet demokratik dhe besueshmëri në institucione nga ana e qytetarëve, që do ta kishin zili jo vetëm vendet e rajonit por edhe jo vetëm pak vendet anëtare të Bashkimit Europian”.

”Kemi miratuar strategjinë për sundimin e ligjit, dhe ligjin për strategjinë antikorrupsion si dhe kemi projektuar draft-dokumentin”.

Tutje, Kurti tha para të pranishmëve se, për gjashtë muaj, kanë shkatërruar 29 grupe kriminale.

”Në fushën e luftimit të krimit të organizuar kundër korrupsion për gjashtë muaj janë realizuar 519 bastisje dhe 283 operacione policore. Nga 23 marsi kur kemi marrë detyrën zyrtarisht, deri tash kemi shkatërruar 29 grupe kriminale”.

”Pra, rezultate konkrete në këtë gjashtëmujor, që është krejt tjetër nga ai gjashtëmujori paraprak”.

Komisioni Evropian në raportin e vitit 2021 për Kosovën vlerëson se sa i përket disa opsioneve që qeveria Kurti ka propozuar lidhur me procesin e vetting-ut siç është rivlerësim i plotë dhe i njëhershëm i të gjithë prokurorëve dhe gjyqtarëve paraqet një burim shqetësimi serioz.