Rast i izoluar: Kosovari nga Gjermania, në kujdes intensiv, pavarësisht vaksinimit

Periskopi.com Lajme

Sipas Institutit Robert Koch, Xhavit Ismajli është një nga 0.03 për qind të më se 50 milionë të vaksinuarve në Gjermani të cilët megjithatë janë infektuar

Edhe pse kishte bërë vaksinimin e plotë vetëm disa javë më parë një shqiptar 50 vjeçar i Kosovës me qëndrim në Bavari, u sëmur nga korona. Atij ju desh të kurohej në njësinë e kujdesit intensiv, shkruan pnp.de. Bëhet fjalë për një rast të pazakontë, thonë mjekët.

Xhavit Ismajli kishte shijuar pushimet e tij në Kosovë, vendlindjen e tij – të paktën në ditët e para. Atëherë 50-vjeçari nga Landau an der Isar vuri re se nuk mund të nuhaste më asgjë, transmeton albinfo.ch. “Papritur më filloi të më dhimbte i gjithë trupi. Kisha dhembje në gjymtyrë”, kujton ai. Shenjat tipike këto të infeksionit me koronavirus.

Pastaj ai u nis për në shtëpi (Gjermani) dhe ju desh të shkonte në njësinë e kujdesit intensiv. Kjo po ndodhte përkundër faktit se Ismajli tashmë ishte vaksinuar plotësisht. Pas kthimit të tij në Gjermani, gjendja e tij vazhdoi të përkeqësohej. Gruaja e tij mori vendimin e duhur: ajo e çoi burrin e saj në spital, në Donau-Isar-Klinikum në Deggendorf, shkruan Passauer Neue Presse (PNP).

Diagnoza që mori atje ishte: Varianti delta i koronavirusit. Ai vuante nga pneumonia. Kjo ishte një tronditje për 50-vjeçarin që ishte vaksinuar vetëm disa javë më parë. Ismajlit i ishte dhënë vaksina nga Johnson & Johnson  – sipas ekspertëve, një dozë e vetme vaksine është e mjaftueshme që ky përbërës aktiv nga Britania e Madhe të ofrojë mbrojtje të plotë nga vaksinimi.

Është e mundur të veprojë virusi pavarësisht vaksinimit por rreziku i sëmundjes minimizohet ndjeshëm përmes mbrojtjes nga vaksina. Efektet e sëmundjes gjithashtu zvogëlohen. Siç raporton Instituti Robert Koch, Ismajli është një nga 0.03 për qind e më shumë se 50 milionë njerëzve të vaksinuar në Gjermani të cilët megjithatë ishin infektuar me virusin, deri më 1 shtator.

Një rrjedhë kaq e rëndë e sëmundjes siç është përvoja e Ismajlit është edhe më e rrallë: ai ishte në njësinë e kujdesit intensiv të klinikës për një javë. Nganjëherë atij i ishte dashur të ventilohej me oksigjen.

“Nuk e kisha menduar se do të më godiste aq keq pa pasur ndonjë sëmundje të mëparshme,” thotë Ismajli për gazetën.

Pas shtatë ditësh në njësinë e kujdesit intensiv, ai u lejua të kthehej në shtëpi ku filloi karantinën. Gjendja e tij është përmirësuar, thotë ai vetë. Megjithatë, ai ende ka vështirësi në frymëmarrje dhe e përcjell një kollë e vazhdueshme. Kur flet gjatë, ai ka nevojë për pushime të rregullta për t’u çlodhur.

Xhavit Ismajli u bën thirrje njerëzve se për mbrojtje nuk mjafton të mbështetemi vetëm në vaksinimin, përcjell albinfo.ch. Në jetën e përditshme, edhe njerëzit që gëzojnë mbrojtje të plotë nga vaksinimi duhet të jenë të kujdesshëm dhe t’u përmbahen rregullave të mirënjohura AHA. Megjithatë, ai e relativizon rastin e tij: “Nuk e di se çfarë do të bëhej me mua po të mos isha vaksinuar”.

Shpërndaje në: