Reagon Bekim Jashari për rrahjen në PDK: Unë angazhohem për të gjithë, pa dallim

Periskopi.com Lajme

 

Kryetari i komunës së Skënderajt, Bekim Jashari ka reaguar pas raportimeve për rrahjet në degën e PDK-së në këtë komunë, ku thuhet se iniciues ishin disa përkrahës të tij, shkruan Periskopi.

Jashari në një reagim që vetëm tërthorazi bën lidhje me rastin, deklaron të gjitha punët që është duke i bërë në të mirë të qytetarëve të kësaj komune.

Ai thotë se “të tjerët po tentojnë ta involvojnë në tema që fare nuk i interesojnë, dhe as që do të merret me to.” Se për çka e ka fjalën konkretisht, nuk dihet.

Sidoqoftë, z.Jashari flet edhe për subjektet politike, duke thënë se nuk do të jetë “fajtori kujdestar për çdo problem që ndodh në këto subjekte” duke bërë referencë të qartë me atë që ndodhi në PDK.

Ky është statusi i plotë i tij në Facebook:

Tē nderuar,

Dje dhe sot kam qenë shumë i angazhuar me projekte në interes të qytetarëve të Skenderajt.

Dje, zyrtarisht në Skenderaj kemi shpërnda 164 bursa për studentë, ndërsa sot kam qenë i angazhuar në takim me biznesmenë, për të sjellë investime në Skenderaj, për të hapur fabrika dhe vende pune.

Pavarësisht angazhimeve të mia, për të mirën e qytetit, janë të tjerët të cilët tentojnë të më involvojnë në tema që fare nuk më interesojnë, dhe as që dua të merrem me to.

Dhe, sado që mundohesh të mos i kushtosh rëndësi çfarë shkruajnë, atëherë kur tentojnë të të nxjerrin ashtu siç nuk je, me gjithë angazhimet e stafit dhe bashkëpunëtorëve, për të sjellë investime, me qëllim të çuarjes përpara këtij vendi të varfër e me numër të lartë të papunësisë, dhe me shumë probleme të tjera, prapësëprapë duhesh t’ua kujtosh faktin se Skenderaj do të jetë ndryshe nga së janë mësuar ta shohin e ta trajtojnë.

Bekim Jashari nuk është as nuk do te jetë fajtori kujdestar për çdo problem që ndodhë në subjektet politike.

Une i kam hapur dyer e bashkëpunimit për të gjithë, pa dallim.

Pavarësisht kësaj, për aq kohë sa do të jem në krye të Komunës, përkrahës të mi i konsideroj të gjithë banorët e Skenderajt. Për mua, të gjithë, pa asnjë dallim, janë qytetarë të barabartë, të njejtë.

Shpërndaje në: