Reagon Ermira Mehmeti: Audio-incizimet janë montazhë

Ermira Mehmeti, politikania më e diskutuar këtë javë, në të gjitha trojet shqiptare, për shkak të shpërndarjes nga media mbarëshqiptare, të një regjistrimi telefonik, për të cilin disa mediume pretendonin se është mes saj dhe zëvendëskryeministrit të Maqedonisë, Musa Xhaferi, reagon për herë të parë, pas skandalit, ekskluzivisht në dritare.net.

“Nuk e kam bërë unë këtë telefonatë. Është pa sens. Është montazhë – thotë Ermira Mehmeti, për dritare.net. Por e zbulova, kush e ka bërë, cili apo cila fshihet pas saj, kush e ka montuar dhe e denoncova në Prokurori, në Shkup, këtë të hënë. Tani do më duhet të mendojë me kujdes çdo hap, ndërsa po pres nga prokuroria ta hetojë dhe të zbulojë arsyet e vërteta që fshihen pas këtij skandali”.

Mehmeti, tregon se ky montazh ka dalë në media për herë të parë mes së shtunës dhe të dielës së javës së shkuar, por ajo është ne dijeni të tij prej janarit 2016, kohë kur kane nisur kërcënimet për të, kërcënime qe ajo i ka denoncuar të gjitha në Prokurori.

“Kërcënimet ishin të njerëzve të nëntokës, të cilët më shantazhuan”, tregon Mehmeti.

Ermira Mehmeti, ka denoncuar këtë të hënë, montazhin dhe shantazhin. E ka bërë privatisht në Prokurori, jo në emër të BDI-së. Por është në kontakt dhe ka lajmëruar partinë që përfaqëson në parlament, për situatën.

“Do dal nga kjo histori e shëmtuar dhe ju siguroj që nuk mbyllem në shtëpi e të qaj, por do ta çoj deri në fund, për të zbuluar publikisht, kush pretendon të marrë përfitime politike, financiare, duke shantazhuar. Unë nuk tërhiqem, sepse nuk kam asgjë për të fshehur” – e mbyll prononcimin e shkurtër, Ermira Mehmeti, politikanja shqiptare, që sapo i ka hyrë një beteje të gjatë.

Ndërkaq Prokuroria e Shkupit, ka pranuar se ka nisur hetimet. Pritet që ajo të flasë pas ekspertizës së materialit të denoncuar nga Mehmeti.