Rektori i Universitetit të Gjakovës u përgjigjet akuzave të studentëve për ngacmime seksuale

Komunikata e cila është dërguar me akuzat për mitmarrje, korrupsion e shantazh drejtuar stafit të administratës e fakulteteve të Universitetit të Gjakovës “ Fehmi Agani”, është demantuar nga rektori i këtij universiteti,  Shaban Buza.

Rektori Buza në një prononcim të dhënë për zëri.info ka thënë se nuk dëshiron ta komentojë deklaratën sepse ajo nuk lë kënd pa e njollosur.

“Është dërguar në emër të Parlamentit ku nuk është identifikuar se nga kush është dërguar kjo komunikatë,  kryetarja e Parlamentit të Universiteti të Gjakovës ka thënë se ky parlament nuk e ka dërguar”, ka deklaruar Buza.

Ai tregon se rastin e ka denoncuar në Policinë Rajonale të Gjakovës, në të cilën sipas Buzës nuk ka pasur asnjë ankesë nga palët e përmendura në komunikatë.

“E kam kontaktuar Policinë e Rajonit të Gjakovës. Kemi pasur një bisedë edhe i kemi diskutuar gjërat siç kanë qenë. Ne jemi shumë të intersuar në qoftë se ka ndonjë abuzim atë ta denoncojnë duje ardhur tek në dhe ma vonë me të ua dërgojnë palëve përkatëse”, ka deklaruar rektori.

Rektorati ka mbetur në mes të kësaj çështje sepse parlamenti  i studentëve nuk është unik dhe për atë gjendja ka ardhur deri në këtë masë ka shtuar tutje Buza.

Akuzat e bëra në komunikatë i ka demantuar edhe kryetarja  e Parlamentit Studentor të Gjakovës Miranda Lushaj, sipas saj ky rast nuk është i vetmi sepse  komunikata të tilla drejtuar mediave nga emaili zyrtar i parlamentit studentor ka pasur edhe më herët.

“Disa ditë me herët është dërguar një komunikatë e tillë në lidhje me profesorin Skender Beqa”, ka deklaruar Lushaj.

Kryetarja e Parlamentit studentor vlerëson se qëllimi i emailit është prishja e imazhit të Universitetit të Gjakovës.

Ndërkohë në komunikatën e dërguar nga të ashtuquajturit “Parlamenti i Studentëve”, thuhet se  pas një hulumtimi të  kryer nga studentët ata kanë siguruar fakte të mjaftueshme që t’i dërgojnë  stafin e “Universitetit të Gjakovës”,  në polici e prokurori për veprat penale si: mitmarrje, ryshfet, korrupsion e shantazh./Zeri.