Sot pritet të dëgjohet dëshmitari i shtatë në rastin e Salih Mustafës

Periskopi.com Lajme

Sot në Dhomat e Specializuara të Kosovës (DhSK) në Hagë, do të fillojë dëgjimi i dëshmitarit të shtatë në rastin e Salih Mustafës, i cili po akuzohet për krime lufte.

Gjykimi i Mustafës ka filluar nga 15 shtatori i këtij viti.

Ai është i arrestuari i parë nga Dhomat e Specializuara.

Në aktakuzën e publikuar nga Gjykata Speciale, pas arrestimit të Salih Mustafës, pretendohet se ai ka kryer krime gjatë luftës së fundit në Kosovë.

Mustafa akuzohet për ndalime arbitrare, trajtime mizore, tortura dhe vrasje të paligjshme, të cilat sipas kësaj aktakuze pretendohet se janë kryer në një kamp ndalimi në fshatin Zllash të Prishtinës.

Sipas aktakuzës së konfirmuar më 12 qershor 2020, Salih Mustafa- komandant Cali po akuzohet si epror i njësitit BIA, që kishte 500-600 anëtarë, vepronin kryesisht në zona të mëdha urbane si Prishtina dhe Obiliqi dhe përreth këtyre zonave, si dhe në rajonin e Gollakut në të cilin ndodhet fshati Zllash.