Surroi kërkon që kryeministri i ardhshëm ta shpartallojë Rrahman Jasharajn: Kërkon vlerësim të mësimdhënësve

Publicistja e njohur kosovare Flaka Surroi në kolumnen e saj të re ka shpalosur “ëndrrën” e saj për hapat që do të duhej t’i ndërmerrte qeveria e re që pritet të formohet pas zgjedhjeve të parakohshme të 6 tetorit.

Kjo ëndërr është 12 pikëshe dhe e realizueshme që prek në mënyrë direkte arsimin, veteranët, pensionistët, shërbyesit civilë, qeveritarët etj.

Në përgjithësi ajo denoncon abuzimin e bërë me paranë publike gjatë këtyre viteve në qeverisje, dhe është e vetëdijshme se masat e këtilla mund të kenë implikime të mëdha buxhetore e që për pasojë e bartin rrezikun e shpërthimeve sociale, shkruan Periskopi.

Në veçanti, znj.Surroi merret edhe me çështjen e arsimit [pika e nëntë] e në të cilën thotë se do t’i bënte vetting arsimtarëve.

“Vetingu i radhës do të ishte i arsimtarëve. Dhe ai/ajo që nuk do ta kalonte provimin e gjuhës amtare do të eliminohej me automatizëm, për të mos folur për shkathtësitë e tjera që do të duhej t’i dëshmonin;” – shkruan Surroi.

Përpjekjen për rivlerësimin e mësimdhënësve e kishin iniciuar edhe qeveritë e mëparshme por të cilat kishin hasur në kundërshtimin kategorik të kryetarit të SBAShK-ut, z.Rrahman Jasharaj.

Jasharaj, që njihet si njeri ngulmues, kishte kërcënuar në vazhdimësi me greva që do ta paralizonin vendin dhe gjatë këtij viti ka arritur disa fitore të mëdha. Ai përmes grevave në fillim të këtij viti, ia doli ta ndryshonte ligjin për paga dhe ta mposhte kryeministrin Haradinaj.

Nuk dihet se si mund të mposhtej kryetari i SBAShK-ut, marrë parasysh përdorimit të efektshëm të instrumentit të grevës që bën kurdo që cenohet në ndonjë formë rehatia e deritashme e mësimdhënësve.

Së fundi, SBAShK-u po zhvillon një luftë me komunën e Kamenicës e cila po dëshiron të mbyllë disa shkolla.

Për të lexuar “Programin e Ëndrrave” të znj.Surroi iu ftojmë të klikoni KËTU. /Periskopi