Haradinaj: BE’së i ka humbur rruga në oborr, nuk mund të jetë Trepça temë e dialogut

Periskopi.com Video

Daçiq: Shqiptarët janë prapa me kohën, ëndërrojnë të vijnë deri në Nish

Periskopi.com Lajme

Shqiptarët nuk e kuptojnë se situata dhe bota ka ndryshuar, tha sot në Soçi zëvendëskryeministri i parë dhe ministri i Jashtëm serb Ivica Daçiq.

Në një konferencë shtypi, pas takimit me diplomatin rus Sergej Lavrov, ai tha se kërkesat e shqiptarëve janë dëshmi e mungesës së gatishmërisë për kompromis.

“Të gjithë duan projektin e Shqipërisë së Madhe dhe për ata e gjithë kjo është pak, duan të vijnë në Nish. Ata do të merrnin gjysmën e Malit të Zi, gjysmën e Maqedonisë dhe në veri të Greqisë”, paralajmëroi Daçiq.

Sipas tij, kremtimi i datëlindjes së ish-presidentit amerikan Bill Clinton ditë më parë në Prishtinë, “është i vetmi vend në botë ku festohet, përveç në shtëpinë e tij.” Kjo është, sipas tij, dëshmi se shqiptarët “kanë mbetur parapa me kohën”.

“Koha ka ndryshuar. Ajo që ata mendojnë, nuk ka asgjë prej saj”, tha Daçiq.

 

Pala kosovare ka në plan t’i japë hov idesë së shkëmbimit të territoreve me Serbinë

Periskopi.com Lajme

Burime të Kohës Ditore, të afërta me këto zhvillime, kanë thënë se opsion është që komuna më veriore e Kosovës- Leposaviqi bashkë me Leshakun të shkëmbehen me Preshevën dhe një pjesë e Bujanocit.

Pjesë e marrëveshjes do të jetë edhe liqeni më i madh artificial që gjendet në veri, Gazivoda.

Presidenca ka refuzuar të deklarohet derisa në kabinetin e Haradinajt e kanë quajtur “të pavërtetë” këtë opsion.

Derisa për Ambasadën amerikane me rëndësi është që“Kosova t’i gjejë qëllimet e veta në dialog”, Gjermania është kundër idesë së shkëmbimit.

Mediat gjermane: S’ka progres nga takimi Thaçi – Vuçiq, bisedimet janë bllokuar

Periskopi.com Lajme

Pas takimit të pasuksesshëm të mërkurën mes presidentit të Kosovës, Thaçi dhe atij serb, Vuçiq, shtypi gjermanofon i kushton vëmendje ngecjes së negociatave mes dy vendeve por edhe një filmi mbi serbët e shqiptarët.

Gazeta zvicerane “Neue Zürcher Zeitung” vëren se edhe takimi i fundit me ndërmjetësimin e BE-së në Bruksel mes presidentit Thaçi dhe atij serb Vuçiq (18.07) nuk ka sjellë asnjë progres të ri në dialog. “Frontet duken të ngrira.” NZZ citon presidentin Thaçi, i cili bëri fjalë “për një nga takimet më të rënda të gjashtë viteve të fundit”. Bisedimet  e së mërkurës nuk zgjatën shumë. Pas takimit edhe presidenti serb u shpreh vetëm se “duhet të vazhdohet të negociohet”.

NZZ vëren se të paktën “të dyja palët kanë rënë në ujdi që të mos nxisin konflikte të reja”. Por duket se Vuçiq ka qenë i pakënaqur. NZZ citon presidentin serb të ketë thënë “kështu nuk funksionon”, lidhur me kërkesën e Prishtinës për njohjen e Kosovës. “Të nevojshme janë kompromise”. Por se për çfarë kompromisi bëhet fjalë, këtë nuk e përmend as NZZ dhe as presidenti Thaçi e Vuçiq nuk e përmendën të mërkurën.

Një film i njëanshëm

Ndërsa gazeta “Frankfurter Allgemeine Zeitung” i kushton vëmendje një filmi që transmentohet nga televizioni ARTE të enjten në mbrëmje, (19.07) një bashkëpunim gjermano-serb me titullin “Enklava” duke e cilësuar atë si një melodramë të Kosovës dhe në mënyrë të padurueshme të njëanshëm.

“Heroi i filmit është 10 vjeçari serb, Nenad…qe jeton me familjen e tij në një… enklavë, që do të thotë që ai përditë duhet të shkojë në shkollë me një automjet të blinduar të KFOR-it, në një shkollë, ku ai është i vetmi nxënës i të vetmes mësuese. …Këtij fëmije i jepet roli të jetë një naiv i guximshëm. Nenad kërkon të luajë me fëmijët e i jepet kësaj dëshire, duke luajtur kukafshehthi me tre djem shqiptarë. Për një moment në film të duket i mundur mirëkuptimi brenda gjeneratës së re, por situata ndryshon, kur pa shkak Bashkimi, lideri i grupit, nuk ia fal Nenadit që serbët i kanë vrarë babanë e tij. ‘Unë nuk kam vrarë askënd’, i përgjigjet Nenadi.”

FAZ i kushton vëmendje prezantimit të ndryshëm të të dyja palëve në konflikt në film duke theksuar se prezantimi i shqiptarit në film është i ngarkuar nga klishetë. “Jo vetëm që përballë Nenad,  figurës simpatike të filmit qëndron një Bashkim i pashkolluar,(asnjë nga djemtë shqiptarë nuk shkon me sa duket në shkollë), por vështrimi i përgjithshëm ndaj Kosovës është i ndarë çuditshëm mëdysh: Këtu shtypja heroike e serbëve krenarë,…andej shqiptarët myslimanë të paraqitur në çdo rast si të prapambetur,… të cilët mezi presin një rast të gënjeshtërt për t’u bërë të dhunshëm.”

 

Sondazhi i KDI-së: Qytetarët e duan Hashim Thaçin bajraktar në bisedimet me Serbinë

Periskopi.com Lajme

Instituti Demokratik i Kosovës (KDI), ka mbajtur sot konferencë për media gjatë së cilës janë shpalosur rezultatet e sondazhit me opinionin publik, lidhur me fazën përfundimtare të dialogut Kosovë-Serbi dhe çështjet aktuale që janë trajtuar se fundi nga partitë politike si zgjedhjet e parakohshme.

Me këtë rast Violeta Haxholli nga KDI ka bërë të ditur se sa i përket pyetjes drejtuar qytetarëve të Kosovës se çfarë presin ata që të përmbajë marrëveshja përfundimtare në kuadër të dialogut Kosovë – Serbi, 61% e tyre kanë deklaruar se presin që kjo marrëveshje të përmbajë njohjen shtetit të Kosovës nga Serbia, 56% anëtarësimin e Kosovës në OKB, 22% shkëmbimin e territoreve midis Kosovës dhe Serbisë, 25% autonomi të zgjeruar për serbët e Kosovës.

Në vazhdim qytetarët janë pyetur mbi pranushmërinë e rezultateve nga kjo marrëveshje. Bazuar në sondazh, Haxholli ka thënë se 97% e qytetarëve të anketuar kanë deklaruar se do të pranonin që rezultati i bisedimeve të fazës finale të jetë njohja e shtetit të Kosovës nga Serbia. Ndërkaq të gjithë qytetarët nga komuniteti shqiptarë e pranojë këtë opsion kurse 91% të komunitetit serb kanë deklaruar se nuk do të pranonin njohjen e shtetit të Kosovës nga Serbia.

Kurse Jeta Krasniqi nga KDI potencoi se në pyetjen se kush duhet të udhëheq grupin negociator të Kosovës në bisedimet me Serbinë, 44% e qytetarëve të anketuar kanë deklaruar se duhet ta udhëheq Presidenti i Kosovës, 31% e tyre mendojnë se duhet ta udhëheqin liderë nga opozita dhe 25% janë të mendimit se grupin negociator në bisedime me Serbinë duhet ta udhëheq Kryeministri i Kosovës.

Në pyetjen se a mendojnë qytetarët e Kosovës se marrëveshja përfundimtare mes Kosovës dhe Serbisë do ta largoj përfundimisht ndikimin e Serbisë nga Kosova, Krasniqi ka bërë të ditur se 48% e të anketuarve mendojnë se kjo nuk do të ndodhë me marrëveshjen përfundimtare.

Krasniqi ka theksuar se qytetarët janë pyetur nëse do të votonin në rast se zgjedhjet parlamentare do të mbaheshin të dielën e ardhshme. 45.3% kanë thënë se do të votonin definitivisht, 29.8% ndoshta do të votonin, 6.9% me gjasë nuk do të votonin, 8.8% definitivisht nuk do të votonin, 3.2% kanë deklaruar se nuk e dinë dhe 6.1% kanë refuzuar të kthejnë përgjigje.

Kurse të pyetur se për cilën parti politike do të votonin, vetëm nga votat e deklaruara: 30.8% kanë dhënë se do të votonin për Lidhjen Demokratike të Kosovës, 23% për Partinë Demokratike të Kosovës, 21.2% për Lëvizjen Vetëvendosje, 10.4% për Aleancën për Ardhmërinë e Kosovës, 6.3% Nisma Socialdemokrate, 2.4% Partia Socialdemokrate, 2% Lista Serbe dhe 4.1% të tjera.

Janë 11.6% e të anketuarve që kanë refuzuar të përgjigjen në këtë pyetje.

Grafikonet e këtij sondazhi mund t’i shkarkoni këtu.

Marrëveshjet e Brukselit që mbahen larg syve të qytetarëve

Periskopi.com Lajme

Kosova dhe Serbia kanë nënshkruar 33 marrëveshje në kuadër të dialogut të Brukselit, por në vazhdimësi të dy qeveritë janë kritikuar për mungesë të transparencës për këtë proces. Madje edhe tani kur kanë kaluar vite nga nënshkrimi i marrëveshjeve disa prej tyre mbahen larg syve të qytetarëve.

Zyrtarë të Bashkimit Evropian thonë se informimi i qytetarëve për procesin e dialogut është në dorë të të dy qeverive. Ndërsa deputetët thonë se ata nuk kanë qenë të informuar mjaftueshëm me marrëveshjet e arritura.

Kurse monitorues të procesit të dialogut thonë se disa marrëveshje nuk janë publikuar në faqen zyrtare të Qeverisë dhe se Qeveria ua ka refuzuar kërkesat për qasje në dokumentet zyrtare, shkruan zeri.

Zyra për Informim në Qeverinë e Kosovës nuk ka dhënë përgjigje nëse janë të publikuara të gjitha marrëveshjet në faqen e Qeverisë, por vetëm ka dërguar linkun në të cilin gjenden disa prej këtyre dokumenteve.

Kërkohet shkarkimi i Hashim Thaçit

Periskopi.com Lajme

Deputeti i Lëvizjes Vetëvendosje, Ismail Kurteshi, ka thënë se çdo gjë që del nga Parlamenti i Kosovës është e pakontestueshme.

“Bisedimet që po bëhen janë tepër të dëmshme. Parlamenti duhet të ulet dhe të caktojë platformën, kufizimet dhe vijat e kuqe“, deklaroi Kurteshi në RTV Dukagjini.

Kurteshi ka hedhur akuza të rënda në drejtim të presidentit Thaçi, duke kërkuar madje edhe shkarkimin e tij.

“Presidenti nuk mund të thotë herë ka vija të kuqe herë nuk ka. Vetëm për deklaratën që ai e ka thënë se “duhet t’i hiqen vijat e kuqe Serbisë”, Kuvendi duhet të fillojë procesin për shkarkimin e tij”, tha më tej ai.

Deputeti i Vetëvendosjes ka thënë se shumë gjëra nuk është dashur të bëhen deri tani në bisedimet me Serbinë.

Sipas tij, ka pasur shumë vija të kuqe, që janë vënë në raport me Serbinë, janë shkelur nga delegacioni i Kosovës.

“Rregullimi i brendshëm i Kosovës nuk është dashur të futet në negociata. Kosova në ato bisedime ka shkuar si shtet i pavarur, por delegacioni i Kosovës është sjell sikur Kosova të ishte krahinë e Serbisë”.

Ai ndër të tjera ka thënë se në bisedime kurrë nuk është përmendur pozita e shqiptarëve që jetojnë në Serbi.