Serbia po i çregjistron shqiptarët nga Lugina e Preshevës

Periskopi.com Lajme

Autoritetet e Serbisë, po vazhdojnë të shkelin të drejtat e shqiptarëve të Luginës së Preshevës.

Tash e sa kohë autoritetet serbe janë duke i larguar shqiptarët e Luginës së Preshevës nga lista e votuesve dhe duke i çregjistruar ata.

Këtë e ka konfirmuar kryetari i Komunës së Bujanocit, Shaip Kamberi, në një intervistë dhënë për lajmi.net.

Kamberi ka treguar se kjo më së shumti është duke u vënë re në Medvegjë dhe se një praktikë e tillë në masë të madhe është duke u zbatuar vetëm për shqiptarët nga autoritetet serbe.

Sipas tij, në lidhje me pasivizimin e vendbanimeve të shqiptarëve janë ankuar në institucionet serbe dhe ato ndërkombëtare.

Kamberi po ashtu ka bërë të ditur se do të ankohen në Gjykatën e Strazburgut për largimin e qytetarëve shqiptarë të Luginës së Preshevës nga regjistri zgjedhor.

“Procesi i pasivizimit të vendbanimeve të shqiptarëve në Luginë të Preshevës, edhe pse ka filluar vite më herët, kohët e fundit është intensifikuar edhe më tepër. Veprime më intensive të pasivizimit kemi në Medvegjë, komunë kjo në të cilën largimi faktik i shqiptarëve është kryer menjëherë pas përfundimit të luftës në Kosovë, kurse tash procesi i pasivizimit po tenton ta legjitimojë atë gjendje. Në Bujanoc edhe Preshevë, edhe pse ka raste të shumta të pasivizimit, ky proces është me intensitet më të ulët. Por, pas kësaj po shihet një tendencë e hapur e qeveritarëve serb që përmes këtyre proceseve të ndryshojnë në mënyrë artificiale strukturën e popullsisë në këtë komunë. Sipas nesh ky është një proces kundërligjorë dhe për këtë kemi njoftuar gjithë mekanizmat ndërkombëtare por, ankesat dhe vërejtjet tona kanë shkuar edhe në adresë të qeverisë serbe. Aq më tepër që pasivizimi i vendbanimit, aktualisht, po shoqërohet edhe me shlyerjen nga regjistri zgjedhorë. Aty këtu ka raste të shlyerjes edhe të serbëve dhe romëve në Bujanoc p.sh., por këto janë raste me numër të vogël. Ne po presim reagimin e faktorit ndërkombëtarë për të parandaluar Serbinë të vazhdojë me këtë proces”, tha ai.

Ndërsa Kamberi ka treguar edhe për arsyetimin e autoriteteve serbe në lidhje më këtë dukuri, duke cekur se edhe qytetarët po ankohen për këto veprime.

“Arsyetimi i thjeshtë i autoriteteve serbe është se po veprojnë në bazë të dispozitave të ligjit për vendbanimin, por edhe bazuar në këtë ligj, sipas interpretimit tonë, Serbia po bën shkelje të të drejtave të individët. Ajo që duhet të ndodhë se krahas ankesave në nivel politik që vazhdimisht po shkojnë, janë edhe vetë qytetarët e goditur ata që duhet të padisin shtetin për këtë diskriminim, sepse kemi të bëjmë me të drejta individuale. Mjerisht numri i padive të qytetarëve në drejtim të shtetit mund të jetë fare simbolik në krahasim me rastet e ndodhura, u shpreh Kamberi.

“Këto janë raste që duhet drejtuar në instancat gjyqësore e mandej sipas nevojës edhe në Gjykatën e Strazburgut” tha ai.