29-vjeçari që u mbyt në det teksa po shpëtonte motrën që martonte të dielën dhe të fejuarën

Periskopi.com Lajme

I riu mbytet në tentativë për të shpëtuar të fejuarën dhe motrën.

29-vjeçari Ervid Palaj nga fshati Shirq i Shkodrës humbi jetën dje në rrethana tragjike në plazhin e Velipojës.

Ngjarja ka ndodhur në Lagunën e Vilunit, ku i riu ndodhej bashkë me të fejuarën dhe motrën për të kaluar disa orë pushime në breg të detit.

Ndërsa të tre ndodheshin në ujë, trazimi i detit për shkak të baticës ka bërë që dy vajzave t’u rrezikohej jeta dhe për këtë arsye i riu është përpjekur t’u japë atyre ndihmë me sa mundej.

Por, ai është gjendur në vështirësi mes dallgëve.

Palaj është ndihmuar nga disa pushues të tjerë, të cilët kanë hedhur dy kamerdare duke menduar se djali do të ishte në gjendje të dilte me forcat e tij, shkruan “Panorama”.

Por, dallgët e mëdha e kanë mundur atë dhe për pasojë 29- vjeçari nuk arriti t’ia dilte dot.

Policia e Shkodrës bën të ditur se ngjarja ka ndodhur rreth orës 13:00, kur deti ishte me dallgë dhe i trazuar.

Pavarësisht përpjekjes së dhjetëra pushuesve për t’i ardhur në ndihmë, ka qenë e pamundur që të mbahej në jetë. Pas përpjekjes së dëshpëruar të pushuesve, pa rezultat ishte dhe ndërhyrja e mjekëve të ambulancës së Qendrës Shëndetësore të Velipojës.

Ky është rasti i dytë tragjik në pak ditë në zonën e Velipojës, ndërsa viktima e parë ishte një pushues nga Kosova.

Gjithashtu, gjatë këtij sezoni turistik ka pasur me dhjetëra raste të tjera të personave që kanë rrezikuar të mbyten në plazhin e Velipojës. Problem është mungesa e kullave për rojet bregdetare, të cilët në pjesën më të madhe të vijës bregdetare nuk janë vendosur. Nga ana tjetër, në një pjesë ku janë vendosur kullat e vrojtimit mungojnë rojet e plazhit ose dhe atje ku janë, prania e tyre nuk e ka eficiencën e duhur në shpëtimin e jetëve të mijëra pushuesve. Vdekja e të riut bëhet akoma edhe më tragjike nga fakti se motra e tij kishte planifikuar të organizonte ceremoninë dasmore të dielën e ardhshme.

Ervid Palaj kishte vetëm 6 muaj që ishte fejuar, ndërsa prej kohësh punonte në qendrën sociale në Dajç, si punonjës social. Ndërsa e fejuara e tij ka rreth 4 vite që punon në Bashkinë Shkodër, si pjesë e Drejtorisë së Shërbimeve Sociale.

 

Kush është Ervid Palaj, i riu që u mbyt në Velipojë duke shpëtuar të fejuarën

Periskopi.com Lajme

Njihej si person i edukuar, i sjellshëm dhe komunikues… por këtë të dielë, në tentativë për të shpëtuar të fejuarën nga vdekja, u mbyt në plazhin e Velipojës.

Fjala është për 29 vjeçarin Ervid Palaj, i cili gjeti vdekjen nga mbytja në Velipojë, këtë mesditë. I riu arriti të shpëtojë nga mbytja të fejuarën, por teksa nxirrte vajzën nga uji, uji dhe dallgët ja kanë marrë jetën.

Ervid Palaj punonte në qendrën komunitare në Dajç si punonjës social.

Në momentin kur Palaj ishte në det me të fejuarën dhe motrën kishte ardhur batica. Ai ka mbajtur të fejuarën në sipërfaqe të ujit, duke u zhytur vetë. Pushuesit e kanë parë të gjithë skenën dhe kanë ofruar ndihmën e tyre. Dy vajzave i është dhënë një kamerdare. I riu është nxjerrë më pas në breg, por për të ka qenë shumë vonë.