Hajdari: Punësimi çështje shumë e rëndësishme për Kosovën

Periskopi.com Lajme

Ish-ministri i Punës dhe Mirëqenies Sociale (MMPS), Skënder Reçica, i ka dorëzuar sot detyrën ministres së re të Ekonomisë, Punësimit, Industrisë dhe Investimeve Strategjike, Rozeta Hajdari.

Me këtë rast ministri i deritanishëm Skënder Reçica, ka njoftuar ministren e re për punët që kanë bërë si ministri dhe reformat e ndërmarra.

“Reforma në fushën ligjore që mbulon këtë ministri, për faktin se kemi trashëguar një kornizë ligjore të mëhershme dhe analizuar me rrethanat socio-ekonomike në vend, tani ka pasur nevojë për një reformë të tillë si nga ajo në sistemin pensional, shërbimeve sociale, asistencës sociale, në marrëdhënien e punës dhe në fuqizimin e Inspektoratit të Punës. Kemi arritur deri aty që të kemi në proces të këtyre reformave një pjesë të ligjeve në Parlament, të cilat një pjesë e tyre kanë kaluar në leximin e parë, por fatkeqësisht ndodhi me shpërndarjen e Parlamentit dhe kanë mbetur thuajse pa mbaruar në leximin e dytë, përfundimin, miratimin, si ligji i punës, ligji për inspektoratin”, tha ai.

Reçica tha se gjatë mandatit të tij është bërë punë e mirë në bashkëpunim me gjithë stafin e ministrisë. Ndërsa, ministrja Rozeta Hajdari, tha se do të vazhdojnë të gjitha punët e mira që janë iniciuar nga kjo ministri, me fokus çështjen e punësimit.

“Ju përgëzoj për të gjithë punët që i keni bërë deri më tani, shpresoj që me kompetencën që e gjej në këtë ministri do të kemi vazhdimin e proceseve të shëndosha që janë iniciuar prej kësaj ministrie. Shpresoj që të gjej bashkëpunim shumë të afërt ashtu siç ju e përmendët, kështu që me juve bashkë do të kem sukses. Vetëm si ministre tash që jam nuk besoj që mund të kem sukses vetëm, pa shërbyesit civilë, pa kolegët nga gjithë drejtoritë dhe agjencionin e punësimit. Unë kam ardhur të marrë mandatin për portofolion e punësimit që është një çështje shumë e rëndësishme për Kosovën, sidomos kur e kemi parasysh rininë, popullatën e re që është e papunë. Me planin qeveritar të ri duhet të bëhen hapa konkretë se çka dhe si të adresohet çështja e punësimit”, tha Hajdari.

Përveç Ministrisë së Punës dhe Mirëqenies Sociale, Hajdari gjatë ditës ka pranuar detyrën e ministres nga ministri i deritanishëm i Tregtisë dhe Industrisë Endrit Shala, ai i Zhvillimit Ekonomik Valdrin Lluka dhe ministri i Inovacionit dhe Ndërmarrësisë, Muzafer Shala