Lëvizja Vetëvendosje dhe Lidhja Demokratike e Kosovës, nuk po mund të merren vesh për formimin e koalicionit qeverisës.

Çështja për të cilën nuk po pajtohen të dyja partitë, ishte njëherë posti i Presidentit, e më pas edhe ai kryetarit të Kuvendit.

Takimi i djeshëm në mes kreut të LVV-së Albin Kurti dhe atij të LDK-së Isa Mustafa, nuk solli rezultat konkret.

Të dyja palët po  insistojnë se posti i kyreparlamentarit duhet t’u takojë partive respektive.  Si pamundësi e arritjes së marrëveshjes, është shfaqur  nevoja për ndërhyrjen ndërkombëtare.

Palët janë pajtuar që sot të zhvillohet një takim bashkë edhe me ambasadorët e Quint-it në Prishtinë si dhe me Shefen e Misionit të BE-së.

Se a do të arrijnë zyrtarët ndërkombëtarë që t’i bindin LVV –në e LDK-në të arrijnë një marrëveshje, kjo mbetet për t’u parë.

Kujtojmë se ndërhyrjet e ndërkombëtarëve në çështje të brendshme të vendit, nuk kanë qenë aspak të mirëpritura nga lideri i opozitës së atëhershme Albin Kurti. Ai në vazhdimësi kritikonte qeveritë e kaluara se pse nuk po vendosin vet.

Dakordimi i Kurtit për të përfshirë edhe vendet e Kuintit në procesin e negociatave me LDK-në, janë parë edhe si shantazh i tij ndaj partnerit e mundshëm qeverisës, LDK-së. /Periskopi/