Fitoret politike të Kosovës në sport

Periskopi.com Lajme

I menjëhershëm ishte dorëzimi i Qeverisë së Spanjës pasi Komiteti Olimpik Ndërkombëtar (IOC) reagoi fuqishëm ndaj diskriminimit që shteti spanjoll ua bëri sportistëve të Kosovës.

Më 11 nëntor një zyrtar i lartë i IOC-së deklaroi se do t’iu sugjerohet federatave ndërkombëtare sportive që të mos ia japin Spanjës të drejtën e organizimit të ngjarjeve të rëndësishme sportive për aq kohë sa ajo nuk siguron trajtim të barabartë për të gjithë pjesëmarrësit, pra edhe për sportistët kosovarë. Dhe menjëherë më 14 nëntor, të mërkurën, Qeveria spanjolle njoftoi se do të ofrojë vizat e nevojshme për sportistët kosovarë dhe do t’ua lejojë atyre simbolet shtetërore në ngjarjet sportive që mbahen në këtë vend.

Kjo u vlerësua të jetë një fitore e madhe e sportit ndaj politikës, një fitore e madhe e IOC-së si organizatë ombrellë sportive, por në mënyrë indirekte edhe një fitore e madhe politike e sportit kosovar, shkruan sot Koha Ditore.

Deri më tash sportistët kosovarë kanë pasur shpesh vështirësi të natyrës politike, por edhe sukseset politike të Kosovës falë sportit kanë qenë prezente. Nuk kanë qenë shumë të shpeshta, por janë vlerësuar me peshë të madhe.

Shumë prej sukseseve politike të sportit ishin të lidhura me xhudon, sportin bindshëm më të suksesshëm të vendit. Dhe bëhet fjalë për ngjarje të mbajtura në vende që nuk e njohin shtetin e Kosovës.

Komiteti Olimpik Ndërkombëtar, presion Spanjës për atletët e Kosovës

Periskopi.com Sporti

Refuzimi i Spanjës që ta njohë pavarësinë e Kosovës është një pengesë për organizimin e garave sportive në këtë vend gjë e cila duhet të zgjidhet shpejt, ka thënë zëvendëspresidenti i Komitetit Olimpik Ndërkombëtar të martën.

Mos-njohja e Kosovës nga Spanja paraqet problem kur atletët nga shteti ynë dëshirojnë të marrin pjesë në gara ndërkombëtare në Spanjë.

Për shembull, gjatë Kampionatit Botëror të Karatesë nga 6 deri më 11 nëntor në Madrid, atletët nga Kosova u lejuan të garojnë me vetëm inicialet e federatës së tyre, KKF, në pjesën e prapme të uniformave të tyre, raporton AFP.

Por në tabelën e rezultateve ata paraqiteshin me “Federata Botërore e Karatesë (WKF) 5”, ndërsa u ndalua si flamuri ashtu edhe himni i tyre.

Kjo bëri që Komiteti Olimpik Ndërkombëtar (IOC) të kërkojë nga federatat ndërkombëtare të mos organizojnë gara të mëdha sportive në Spanjë derisa kjo të zgjidhet, ka thënë për AFP-në një burim i afërt me organin që ka selinë në Zvicër.

“Ne mund ta njohim ose jo një vend në nivel politik, por ne s’kemi opinion në këtë çështje”, ka thënë para reporterëve në Madrid zëvendëspresidenti i IOC-së, Juan Antonio Samaranch, i cili vjen nga Spanja, transmeton Koha.net.

“Por ne duhet të gjejmë dhe të zbatojmë zgjidhje në mënyrë që atletët të mbrohen dhe të mund të marrin pjesë duke, së paku, mbrojtur komitetin Olimpik të vendit të tyre. Kjo është një çështje që duhet zgjidhur këtu, sepse Komiteti Olimpik Ndërkombëtar do të tundohet që të përqendrohet në të”.

“Unë nuk e shoh këtë çështje si problem të madh, është problem që do të zgjidhet shpejt”, shtoi ai.

Spanja, e cila do të organizojë finalen e Ligës së Kampionëve në qershor, planifikon të aplikojë për organizimin e Olimpiadës Dimërore 2030 në Barcelonë dhe në malet e afërta Pirineje, duke i dhënë atij nxitje shtesë për të zgjidhur problemin.

Në një deklaratë, sekretarja shtetërore spanjolle e Sportit, Maria Jose Rienda, tha se atletët kosovarë e “e kishin të garantuar” sigurinë gjatë kampionatit të karatesë javën e kaluar dhe i bëri thirrje IOC-së që të diskutojë këtë çështje me këshillin qeveritar spanjoll të Sportit të cilin ajo e drejton.