Në Burgun e Sigurisë së Lartë do të filloj të prodhohet letra higjienike

Periskopi.com Lajme

Shërbimi Korrektues i Kosovës ka njoftuar se ka pranuar donacion nga UNOPS-i, makina për prodhimin e letrës higjienike dhe letrës së kuzhinës. Ky donacion i dedikohet aktiviteteve të punës së organizuar nëpër burgje.

Përmes këtij donacioni, në Burgun e Sigurisë së Lartë do të angazhohen në punë rreth dhjetë të burgosur, e që gradualisht synohet edhe në rritjen e kapaciteteve prodhuese, me çka do të rritet edhe numri i të punësuarve.

“Shërbimi Korrektues i Kosovës përmes këtij projekti, përveçse synon rehabilitimin edhe risocializimin e personave të burgosur, synon në uljen e shpenzimeve ekonomike në letër higjienike për 50%, si dhe në rritjen e nivelit të higjienës dhe pastërtisë nëpër të gjitha institucionet korrektuese”, thuhet në komunikatë.

SHKK synon që me angazhimin e të burgosurve në pune të tilla të normalizohet edhe jeta e përditshme në burgje.

Produktet e prodhuara nga të burgosurit e BSL-së, do të përdoren për nevojat e të gjitha institucioneve korrektuese, e në të ardhmen të plasohen edhe në tregun vendor.