Dhjetëra autobusë nga Serbia vijnë në Veri

Periskopi.com Lajme

Në qendrën më të madhe në Veri të Mitrovicës ka pasur një numër të madh të votuesve, njofton Klan Kosova.

Gazetari i Klan Kosovës, Besnik Tahiri, i cili po i mbulon zgjedhjet atje, ka thënë se ka informacione se tash kanë hyrë dhjetëra autobusë nga Serbia në Kosovë të mbushur plot me votues të një subjekti të caktuar politik.

Të gjithë ata votues, do të jenë në favor të një opsioni politik të caktuar serb në Kosovë, e që është Lista Serbe.

Mallrat e Serbisë pakësohen dukshëm në tregun e Kosovës

Periskopi.com Lajme

Janë bërë gati tetë muaj kur Qeveria e Kosovës ka vendosur taksën 100 për qind për produktet e importuara nga Serbia dhe Bosnje e Hercegovina. Që nga kjo periudhë, importi nga Serbia ka shënuar rënie drastike, thonë autoritetet kompetente në Kosovë.

Serbia, e cila para vendosjes së taksës ishte eksportuesja më e madhe e produkteve në Kosovë, për këta tetë muajt e fundit ka rënë si eksportuese e mallrave në rreth 4 milionë euro.

Ky shtet, para 21 nëntorit, të vitit të kaluar, gjatë një dite ka eksportuar në Kosovë mallra në vlerë prej rreth 1.2 milion euro apo më shumë se 360 milionë euro brenda një viti.

Adriatik Stavileci, zëdhënës në Doganën e Kosovës, thotë për Radion Evropa e Lirë, se “gjatë ditëve të fundit nuk është vërejtur ndonjë rritje e importit nga Serbia apo rritje e kontrabandës.

“Më duhet të theksoj se mallrat nga Serbia dhe Bosnje e Hercegovina nga nëntori i vitit të kaluar, kanë shënuar rënie drastike, kur flitet për importin”, bën të ditur Stavileci.

Mesatarja ditore e importeve nga Serbia, thotë Stavileci, është rreth 10 dërgesa, ku një pjesë prej tyre janë ndihma humanitare, disa janë dërgesa komerciale, të cilat i nënshtrohen taksës prej 100 për qind. Produktet komerciale janë, ushqime, lëndë e parë, paketimi etj.

“Vlera e përgjithshme e importeve nga Serbia ka arritur në rreth 4 milionë euro”, thotë Stavileci.

Vetëm në muajin maj, sipas Agjencisë së Statistikave të Kosovës, importi i mallrave nga Serbia në Kosovë ishte 519 mijë euro, nga më shumë se 39 milionë euro sa ishte në periudhën e njëjtë të vitit të kaluar.

Gjatë kësaj periudhe, të aplikimit të taksës, disa shoqata ekonomike dhe organizata joqeveritare kanë bërë hulumtime lidhur me efektet e taksës nga aspekti ekonomik. Disa hulumtime kanë rezultuar se kjo taksë ka ndikuar në rritjen e prodhimeve vendore, përderisa organizata joqeveritare kanë pohuar se efektet nuk kanë qenë në nivel të kënaqshëm.

Kryetari i Odës Ekonomike të Kosovës, Berat Rukiqi, në një bisedë për Radion Evropa e Lirë, thotë se edhe pas vendosjes së taksës, në treg nuk ka pasur mungesë të produkteve, pasi afaristët në Kosovë shumë shpejt kanë gjetur alternativa për zëvendësim të produkteve nga vendet e rajonit dhe Bashkimit Evropian.

“Ne i konsiderojmë dy efekte kryesore, i pari ka të bëjë me riorientimin e tregtisë. Për të gjitha ato produkte, me të cilat tregu i Kosovës është furnizuar nga Serbia dhe Bosnja, sot ka zëvendësime nga vendet tjera. Dhe e dyta, ajo që vërehet është një prezencë më e madhe e produkteve vendore të konsumit të gjerë”, thekson Rukiqi.

Po, sipas të dhënave të ASK-së, nga shtetet anëtare të Bashkimit Evropian, me pjesëmarrje më të lartë të importit në Kosovë janë Gjermania, Greqia dhe Italia, kurse nga vendet e rajonit më produkte me sasi më të mëdha në tregun e Kosovës është Shqipëria e pasuar nga Maqedonia e Veriut.

Një efekt tjetër i taksës, është edhe luhatja e çmimeve. Berat Rukiqi thotë se gjatë kësaj periudhe ka pasur një ngritje të lehte të çmimeve në disa nga artikujt.

“Sa i përket çmimeve, normalisht që për disa produkte ka pasur një ngritje të çmimit jo shumë të madhe, sidomos për shkak të kostos të transportit. Në çdo rast furnizimi nga vendet më të largëta ka kosto më madhe të transportit dhe kjo ka ndikuar edhe në çmime”, shpjegon Rukiqi.

Qeveria e Kosovës në nëntor të vitit të kaluar, ka marrë vendim për taksën doganore, fillimisht 10 për qind e më pas 100 për qind për produktet e Serbisë dhe Bosnjë Hercegovinës.

Përveç efekteve ekonomike kjo taksë ka paraqitur edhe efekte politike. Bashkimit Evropian dhe Shtetet e Bashkuara të Amerikës në vazhdimësi kanë kërkuar pezullimin apo anulimin e kësaj takse. Vendosjen e taksës, Beogradi e ka cilësuar si pengesë për vazhdimin e dialogut ndërmjet Prishtinës dhe Beogradit, të lehtësuar nga Bashkimi Evropian.

Por, autoritetet në Prishtinë kanë deklaruar se taksa 100 për qind ndaj mallrave të importuara nga Serbia dhe Bosnje e Hercegovina nuk paraqet pengesë për vazhdimin e dialogut, por pengesa qëndron në mungesën e gatishmërisë së Serbisë për ta njohur Kosovën.

“Barnat me origjinë nga Serbia nuk janë vetëm në Prishtinë por në gjithë Kosovën”

Periskopi.com Lajme

Drejtori i Shëndetësisë në Komunën e Prishtinës, Bujar Gashi, ka thënë se barnat me origjinë serbe nuk janë vetëm në komunën e Prishtinës por në të gjithë Kosovën.

Ai ka thënë se prioritet i komunës është që qytetarët të mos kenë mungesë të barnave.

“Kujdesi jonë parësor është që qytetarët tanë të mos mbesin pa barna. Lajmi ishte vetëm për komunën e Prishtinës por unë mendoj që ato janë të pranishme në tërë Kosovën”, ka thënë ai.

Ndërkaq duke folur për dezinfektimin, ai ka thënë se faza e parë e dezinfektimit të hapësirës në Prishtinë ka përfunduar, ndërkaq për fazën tjetër është paralajmëruar se do të jetë një mot i favorshëm për këtë proces.

Ai ka thënë se në fazën e dytë do të bëhet dezinfektimi për disa fshatra të Komunës së Prishtinës ashtu siç është paraparë me kontratën e vitit të kaluar.

Sipas tij, disa nga fshatrat nuk kanë pranuar që ky proces të kryhet.

Gashi në KTV ka thënë se regjioni i Prishtinës nuk njihet si zonë endemike.

“Ne javët e fundit kemi marrë disa kërkesa nga qytetarët e Prishtinës ku kanë lajmëruar për pickim të rriqrave mirëpo këto ndodhin më shumë në pjesët rurale jo në qytet”, thotë ai.

Ai ka thënë se do të jenë gjashtë faza të dezinfektimit.

Duke folur për mungesën e barnave dhe materialit shpenzues në qendrat e mjekësisë familjare, ai ka thënë se nuk ka pasur ankesa, pasi që sipas tij, në vazhdimësi qendrat pajisen me material.

Ndërkaq lidhur me rritjen e çmimeve për qytetarët e komunave tjera gjatë kontrollit në qendrat e mjekësisë familjare, ai ka thënë se, një iniciativë e tillë është filluar për t’i mbrojtur qytetarët e Prishtinës.

“Qytetarët e komunave tjera kanë qendra familjare në komunat e tyre. Nuk ka qenë çmim i papërballueshëm por çmim me i vetëdijesuar qytetarët e komunave tjera. Unë shpresoj që kuvendi i komunës do ta kalojë këtë pikë”, thotë ai.