Lushtaku: Ja pse nuk e dërgova Gardën në varrimin e Rugovës

Periskopi.com Lajme

Ish-komandanti i UÇK’së, Nuredin Lushtaku përmes një publikimi në rrjetin social “Facebook” ka treguar pse nuk e ka dërguar gradën e Kosovës në varrimin e presidentit të ndjerë të Kosovës, Ibrahim Rugova, nga vdekja e të cilit sot u bënë 13 vite – raporton Periskopi.

Lushtaku, ka shpërndarë disa fotografi të shkrimeve të gazetave të atëhershme, të cilat Rugova, si udhëheqës i LDK’së, kishte mohuar ekzistencën e Ushtrisë Çlirimtare të Kosovës.

Madje, në titujt e gazetave citohej Rugova, i cili e kishte cilësuar UÇK’në si “lojë serbe”.

https://www.facebook.com/GjeneralNuredinLushtaku/posts/2230605730514147

Në të njëjtat shkrime për UÇK’në, zyrtarë të LDK’së kishin thënë se nuk kanë asnjë lidhje, me atë që e cilësonin madje edhe si organizatë terroriste.

Nuredin Lushtaku kishte qenë Komandant i Gradës në kohën kur vdiq presidenti Ibrahim Rugova.

Faji kryesor për dështimin e përcjelljes së Rugovës për në banesën e fundit me ceremoni nga TMK’ja, përveç Lushtakut, binte edhe te Agim Çeku, i cili atë kohë ishte Komandant i Përgjithshëm i TMK’së.

Pas refuzimit të TMK’së, Rugova ishte përcjellë deri te varri nga Shërbimi Policor i Kosovës. /PERISKOPI

 

​Bekim Jashari i del në mbështetje Lushtakut

Periskopi.com Lajme

Kryetari i Komunës së Skenderajt i ka dhënë mbështetje ish-komandantit të UÇK-së, gjeneral Nuredin Lushtakut, në lidhje me shkresën e tij publiku, ku ka kërkuar sqarim se pse ai është përfshi në aktakuzën për mashtrime me listën e veteranëve të UÇK-së.

Lushtaku i cili tani është nënkryetar i Skenderajt, mbrëmë ka kërkuar sqarim nga presidenti Thaçi, kryeprokurori Lumezi, ish-prokurori Blakaj dhe prokurori Hoxha, që t’i jepet sqarim se pse është i përfshirë në aktakuzën e veteranëve, kur ka marrë pjesë vetëm një herë në mbledhjen e Komisionit Qeveritar për Verifikimin e Veteranëve, në të cilën mbledhje nuk është marr asnjë vendim.

“Gjeneral Nuredin Lushtaku

Unë besoj në sinqeritetin, drejtësinë dhe korrektësin tënde! Poashtu, shpresoj që shumë shpejt do të dalë e vërteta në shesh”, ka shkruar Bekim Jashari në Facebook, ndërsa ka publikuar edhe procesverbalet e mbledhjeve të Komisionit Qeveritar për Verifikimin e Veteranëve.

 

Lushtaku kërkon sqarim për përfshirje në aktakuzën për veteranët mashtrues

Periskopi.com Lajme

Nënkryetari i komunës së Skenderajt, Nuredin Lushtaku përmes një letre publike iu është drejtuar presidentit të vendit, Hashim Thaçi dhe prokurorëve prej të cilëve ka kërkuar shpjegim lidhur me atë se pse është ngritur aktakuzë ndaj tij për rastin e ‘veteranëve mashtrues’.

Lushtaku , emri i të cilit figuron në mesin e 12 të akuzuarve në këtë rast ka thënë se në 29 mbledhje sa kishte mbajtur gjithsej Komisioni Qeveritar, ai mori pjesë vetëm në një mbledhje ku sqaron se në atë mbledhje nuk është marrë asnjë vendim, edhe pse sipas tij në atë mbledhje ishte diskutuar çështja e legalizimit të së ashtuquajturës Brigada ‘Hasan Pristhina’, transmeton Indeksonline.

Lushtaku ka thënë se është plotësisht i pafajshëm dhe se çdo gjë do të dëshmohet në gjykatës por që sipas tij tashëm i është shkaktuar dëm në aspektin personal e familjarë dhe se aktakuza është ngritur pa fakte dhe me qëllime të këqija.

Letra e plotë:

Të nderuar qytetarë,
Të nderuar bashkëluftëtarë,
I nderuar ish prokuror Blakaj,
I nderuar prokuror Hoxha,
I nderuar kryeprokuror Lumezi,
I nderuar president Thaçi,

A mundeni të më jepni një sqarim publik përse unë ndodhem në aktakuzë, për shkak se unë kam marrë pjesë në vetëm një mbledhje të Komisionit Qeveritare për Verifikimin e Veteranëve, nga njëzet e nëntë (29) mbledhje sa janë mbajtur gjithsejtë, që ka qenë mbledhja nr.26, e në të cilën nuk kemi aprovuar asgjë. Ndërsa, në diskutim në atë mbledhje ka qenë e ashtu quajtura Brigada “Hasan Prishtina” për të cilën unë kam deklaruar se nuk ka ekzistuar gjatë luftës dhe nuk kam pranuar që ajo të aprovohet, për çka ekzistojnë dëshmitë e deklarimit tim (te cilën i’a bashkangjes këtij reagimi).

Pra, unë kam marrë pjesë në vetëm një mbledhje nga njëzet e nëntë (29) sa janë mbajtur gjithsejtë, në të cilën kam zëvendësuar Sami Lushtakun, ish Komandantin e ZO të Drenicës,

Sipas procesverbaleve të marrura nga shkresat e prokurorisë në te gjitha mbledhjet e Komisionit Qeveritar Për Verifikimin e Veteranëve pjesëmarrja në mbledhje është kjo:

  1. Hashim Thaqi (ish Kryeminister) – ka marrë pjesë në 4 takime
    2. Azem Syla ( SHP UÇK) – ka marrë pjesë në 2 takime
    3. Agim Çeku (SH.P.UÇK) – ka marrë pjesë në 24 takime
    4. Sami Lushtaku (ZO Drenicës) – ka marrë pjesë në 11 takime
    5. Sadik Halitjaha (ZOP) – ka marrë pjesë në 28 takime
    6. Shkumbin Demalijaj (ZOD) -– ka marrë pjesë në 25 takime
    7. Qelë Gashi (ZOLL) – ka marrë pjesë në 27 takime
    8. Rrahman Rama (ZOSH) – ka marrë pjesë në 17 takime
    9. Shukri Buja (ZON) – ka marrë pjesë në 13 takime
    10. Ahmet Daku (ZOK) – ka marrë pjesë në 22 takime
    11. Avdi Raci (SH.P.TMK) – ka marrë pjesë në 18 takime
    12. Muharrem Xhemajli (OVL-UÇK) – ka marrë pjesë në 15 takime
    13. Fadil Shurdha (OIL – UÇK) – ka marrë pjesë në 26 takime
    14. Xhavit Jashari (OFD-UÇK) – ka marrë pjesë në 27 takime
    15. Rrustem Berisha (ish MINISTER I MBROJTJES) – ka marrë pjesë në 25 takime
    16. Fadil Racaj (MPMS) – ka marrë pjesë në 8 takime
    17. Faik Fazliu (ZKM-OVL-UCK) – ka marrë pjesë 27 takime
    18. Jahir Demaku (FSK) – ka marrë pjesë në 8 takime
    19. Smajl Elezi (OVL UÇK) – ka marrë pjesë në 11 takime
    20. Shemsi Syla (ZOK) – ka marrë pjesë në 1 takim
    21. Emin Musa (ZOSH) – ka marrë pjesë në 1 takim
    22. Faton Klinaku (OVL UÇK) – ka marrë pjesë në 1 takim
    23. Hysni Gucati (OVL-UCK) – ka marrë pjesë në 1 takim
    24. Nuredin Lushtaku (ZO Drenicës) – ka marrë pjesë në 1 takim

Atëherë pyes publikisht: ku është drejtësia këtu, ku është barazia para ligjit?

Për cilën shkelje ligjore më keni futur në këtë proces? Nëse është për pjesëmarrje në Komision Qeveritar siç janë pretendimet e Prokurorisë, nga të gjithë pjesëmarrësit unë kam marrë më së paku pjesë në mbledhje, pra vetëm një herë. Logjikisht dhe juridikisht kam pas përgjegjësinë më të vogël ose thënë më mirë, nuk kam pasur kurrfarë përgjegjësie në Komision Qeveritar.

Nuk dua të keqkuptohem, sepse të gjithë janë dijeni se kam deklaruar publikisht që kam nënshkruar Listën e ushtarëve të Brigadës 114 “Fehmi Lladrovci” dhe për këtë jam i gatshëm të përgjigjem në çdo kohë. Por nga prokuroria nuk po më kërkohet përgjegjësi për këtë, por për pjesëmarrje në Komisionin Qeveritar, në mbledhjen e të cilit me rastin e pjesëmarrjes time nuk është marrë asnjë vendim.

Këtë reagim e bëra pasi që kam marrë shkresat e lëndës së “hetimeve” dhe “aktakuzës”, a po marrisë së “drejtësisë” tonë!

Për hir të së drejtës dhe transparencës së plotë dhe për ta kuptuar çdo qytetarë procesin në Komisionin Qeveritarë, këtij reagimi po ia bashkëngjiti edhe të gjitha procesverbalet nga njëzet e nëntë (29) takimet e mbajtura. Gjithashtu, nëse është e nevojshme do t’i publikoj edhe transkriptet e këtyre takimeve, në mënyrë që qytetarët ta kuptojnë drejtë të vërtetën në procesin e verifikimit të veteranëve dhe t’i dinë përgjegjësit për shtimin e numrit te tyre, për çka ju garantoj se unë nuk kam kurrfarë përgjegjësie.

Unë jam plotësisht i pafajshëm, gjë që do të dëshmohet në gjykatë, mirëpo tashmë veçse më është shkaktuar dëm në aspektin personal e familjar. Kjo aktakuzë është ngritur pa fakte (me ‘fakte’ të montuara) dhe me qëllime të këqija, për të më dëmtuar për shkak të qëndrimeve të mia të palëkundura, për të cilat asnjëherë në jetën time nuk kam bërë kompromise.

Sinqerisht,

Gjeneral Nuredin Lushtaku

 

Lushtaku për aktakuzën u njoftua nga mediat, thotë se dikush po luan politika të pista

Periskopi.com Lajme

Prokuroria Speciale e Kosovës sot ka ngritur aktakuzë kundër 12 të pandehurve, për lëndën e njohur në opinion si “Veteranët” në drejtim të veprës penale “keqpërdorimi i pozitës apo autoritetit zyrtar’.

Të akuzuarit në fjalë janë: Agim Çeku, Nuredin Lushtaku, Sadik Halitjaha, Shkumbin Demalijaj, Qelë Gashi, Shukri Buja, Ahmet Daku, Rrustem Berisha , Faik Fazliu, Xhavit Jashari dhe S.E dhe F.SH.

Periskopi ka kontaktuar me Nuredin Lushtakun, emri i të cilit figuron në aktakuzën për mashtrime me listat e veteranëve. Ai ka thënë se ende nuk ka pranuar  ndonjë konfirmim zyrtar nga Prokuroria për ndonjë aktakuzë ndaj tij.

‘’Asnjë njoftim zyrtar nuk e kam për ngritje të aktakuzës ndaj meje. Të vërtetën e kësaj aktakuze unë nuk e di as vetë. Unë e kam thënë edhe herën e parë atëherë dhe kam qenë në Prokurori sikurse shumë të tjerët që kanë qenë. Më ka pyet rreth procesit Prokurori, qysh ka shku procesi. Edhe une nuk e di që kam pasë asnjë aktakuzë të ngritne ose akuzohem për diçka’’, ka qenë përgjigja e tij për Periskopin.

Lushtaku, si verifikues i brigadës 114,  sikurse para një muaji, thotë se këto informacione po i merr përmes mediave dhe se dikush po luan politika të pista me këtë çështje.

‘’Nuk e di cfarë aktakuze i bëhet dikujt kur nuk njoftohet për asnjë gjë dhe në media e marrin mediat përpara. Pak a shumë po dihet cka janë këto aktakuza, por ata që i kanë bërë le t’i bëjnë deri në fund, tani te kqyrim. Se këto politika të pista është ka i bën dikush për teke të veta edhe le t’i grahin.’’, thotë Lushtaku.

Lidhur me fryerjen e listave të veteranëve të luftës së fundit në Kosovë, Lushtaku ka thënë se Prokuroria duhet të merret me këtë punë dhe se krejt çka ka ditur i ka thënë para Prokurorisë më herët.

‘’Shko vete Prokurorinë, ata e dinë e kanë bo këtë problem qysh e kanë bërë. Listat  i kanë, edhe të mëhershmet edhe le t’i kqyrin edhe le t’i vlerësojnë çka. Edhe Prokurorinë, edhe institucionet. Unë çka kam pasë me thanë, i kam thanë kur më ka vetë ai zotëria atje dhe i kanë shënimet’’, shton Lushtaku.

Prokuroria në aktakuzë ka propozuar që gjykata të lëshojë masën për ndalimin e pagesës së pensioneve të fituara në mënyrë të kundërligjshme si veteran luftëtarë të UÇK-së, deri në përfundimin e procedurës penale.

Nga provat e siguruara deri më tani është vërtetuar se nga pagesat e kundërligjshme për veteranët luftëtarë të UÇK-së, buxheti i Republikës së Kosovës është dëmtuar në shumë prej 68.153.533.14 euro./Periskopi/

 

Lushtaku mohon aktakuzën: Kush dreqin po bën politikë me këtë rast

Periskopi.com Lajme

Dorëheqja e prokurorit të Prokurorisë Speciale të Kosovës , Elez Blakaj ngjalli para disa ditësh debatin e madh për listën e fryer të veteranëve të Ushtrisë Çlirimtare të Kosovës (UÇK). Madje në një dokument  të siguruar nga ‘Koha Ditore’ del se ky prokuror më datën 11 korrik të këtij viti ka ngritur aktakuzë ndaj 12 personave,  anëtarë të Komisionit qeveritar për njohjen dhe verifikimin e statusit. Në aktakuzë thuhet se për të rehatuar veteranët mashtrues, u shpik edhe një brigadë e ‘themeluar’ në vitin 2016, për të cilën deri më tani nuk ishte dëgjuar.

Një prej emrave të akuzuar, Nuredin Lushtaku për Periskopin ka thënë se nuk ka informacione se është ngritur aktakuzë ndaj tij, apo ndaj dikujt tjetër për këtë çështje. Sipas tij, tërë këtë politikë të ‘pistë’ po e luajnë media të caktuara.

‘’Unë nuk e di që ka aktakuzë, ju e keni dëgju edhe vetë prokurorin që ka thënë s’ka aktakuzë ndaj askujt. S’di pse po pyetni. Koha Ditore mundet me rrejt, s’ka aktakuzë, ku e ka pa ajo. Koha Ditore nuk e di ku e ka marrë atë liste e çka ka ba, ama po të them që unë nuk kam kurrfarë informate që jam i akuzuar për diçka. As ftesë, as njoftim, as kurgjo. Këto politikë të pistë që i bëjnë disa media, a kush dreqin është ka i  bën, le të merren ata me to. Unë kam  qenë e kam dhënë deklaratë, normal qysh janë kan krejt njerëzit që ka qenë  në atë proces, nuk kam qenë vetëm unë. Plot janë kanë që s’kanë qit aty emra hiq. S’kena qenë vetëm unë e Agim Çeku, por gjithë me rend. Por nuk i kanë qit emrat, por po dojnë me bo politika me emra. Unë nuk e kam atë problem, e kam thënë edhe më herët’’, ka treguar Lushtaku për Periskopin.

Ai thotë se  është i gatshëm të përgjigjet në çdo moment për përgjegjësitë e tij që i ka si verifikues i brigadës 114.

‘’Kam qenë me dhënë deklaratë dhe jam i gatshëm të shkoj sa herë kërkon dikush me shku me dhënë deklratë për punën dhe përgjegjësinë tem që e kam pasë. Unë e kam pasë përgjegjësinë ndaj brigadës 114 me verifiku, që kannë qenë përgjegjësi të mija dhe për atë punë jam i gatshëm me dhënë përgjegjësi sa herë të më thërrem dikush dhe aty ku është nënshkrimi im, përgjigjem une. Për tjerat gjëra, le të përgjigjet kush çka ka bo dhe qysh.’’, thotë Lushtaku.

Lushtaku lidhur me brigadën e shpikur ‘Hasan Prishtina’, në mënyrë kategorike ka thënë se nuk ka ekzistuar dhe nuk ekziston. Ai thotë se ka qenë indiferent ndaj saj dhe se nuk do të merret me të.

‘’Sa i përket brigadës Hasan Prishtina, ajo brigadë  s’ka ekzistu. Nuk më intereson rreth saj dhe as që më ka interesu gjatë verifikimit. Janë edhe procesverbalet që i ka edhe gjykata, edhe procesverabalet edhe komisioni kur ka qenë, e të gjitha.  I vetmi takim në komisionin e përgjithshëm që kam marrë pjesë është ai takim për brigadën. Unë u kam thënë që nuk i njoh si ushtarë as s’ka qenë kjo brigadë në atë kohë,dhe as nuk dua të merrem me ta. Kush do të merret me këtë punë, le të merret. Nuk ka ekzistu për mua asgjë. Të njejtat gjana i kam thënë edhe në takim të komisonit dhe në deklaratën që e kam dhënë, s’ka ekzistu dhe çka kanë bë me të e çka jo, nuk e di.’’, thotë Lushtaku.

Në aktakuzën e siguruar nga Koha Ditore, të akuzuar për këtë rast dalin të jenë : Agim Çeku, Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Smajl Elezaj, Fadil Shurdhaj, Xhavit Jashari.

Të gjithë këta, si anëtarë të Komisionit qeveritar për njohjen dhe verifikimin e statusit të dëshmorit të kombit, invalidit, veteranit, pjesëtarit dhe të internuarit të Luftës së Ushtrisë Çlirimtare të Kosovës, “në cilësinë e personave zyrtarë, me dashje kanë tejkaluar kompetencat e tyre, si dhe nuk i kanë përmbushur detyrat zyrtare, me qëllim që t’ua mundësojnë personave të tjerë të përfitojnë kundërligjshëm në vazhdimësi në dëm të buxhetit të Republikës së Kosovës”, thuhet në aktakuzën e nënshkruar nga prokurori i rastit.

Fiks 38 milionë e 882 mijë e 400 euro për një vit i kushtojnë buxhetit të shtetit 19.060 ”veteranët e rrejshëm”, të cilët i ka identifikuar prokurori special i dorëhequr ditë më parë, Elez Blakaj./Periskopi/

 

 

 

I akuzuari Lushtaku: Më ka intervistuar prokurori Blakaj, llogari të japin krerët e shtetit

Periskopi.com Lajme

Dorëheqja e prokurorit të Prokurorisë Speciale të Kosovës, Elez Blakaj  ka hapur dyshime se kërcënimet që ai kishte pranuar deri sa po hetonte disa raste që lidhen  me listat e fryra të veteranëve të Ushtrisë Çlirimtare të Kosovës (UCK) dhe rasteve të terrorizmit e kanë detyruar të dorëhiqet.

Madje u raportua se Blakaj kishte ngritur aktakuzë ndaj profilit të lartë të veteranëve dhe listës së personave të akuzuar i prinë Agim Çeku, i pasuar nga Nuredin Lushtaku dhe disa të tjerë.

Mirëpo, njëri ndër themeluesit e UÇK-së, ish-Komandanti i Gardës së Kosovës, ish-deputeti i Kuvendit të  Kosovës dhe aktualisht nënkryetar i Komunës së Skenderajt,  Nuredin Lushtaku, ka mohuar ekzistimin e një aktakuze të tillë ndaj tij.

Në një prononcim për “Zëri”, Lushtaku ka pohuar se është intervistuar nga prokurori Blakaj, mirëpo që nuk e di se në çfarë cilësie ishte intervistuar. Lushtaku tha se është i gatshëm të marr çfarëdo përgjegjësie për Brigadën 114.

“Po vallahi u deshtë me i pyet ato media që po shkruajnë, unë jam kanë e kam dhënë një deklaratë rreth procedurave, si kanë shkuar, diçka konkrete jo, edhe nuk e di as në çfarë cilësie ma kanë qit emrin aty.  Unë jam kanë përgjegjës për brigadën 114 edhe jam i gatshëm me dhënë përgjegjësi deri në fund. Aty as nuk është cekur çka e qysh, ata që po i bëjnë këto politika ndoshta e dinë më mirë. Nuk më ka njoftuar kush që kam aktakuzë të ngritur”, është shprehur Lushtaku për “Zëri”.

Ai mohon çfarëdo kërcënimi të mundshëm drejt prokurorit Blakaj.

Sipas tij përgjegjësi dhe llogari duhet të jap secili për veti, duke nisur nga krerët më të lart të shtetit.

“Po nuk e di qysh po më pyet mu kështu bre. Çka me pas kërcënim prej anës time ai. Unë z. Blakaj kurrë s’e kam pa as nuk e njohë, veç një herë  kur jam kanë me dhënë deklaratën edhe asnjë komunikim me të në jetën time s’e kam pasur, as nuk e di pse ka dhënë dorëheqje as nuk më intereson ajo punë. Unë i kam thënë edhe kur jam kanë se jam i gatshëm që deri në fund për përgjegjësinë time me dhënë llogari. Nëse fillojnë i përdorin këto politika, këtu duhet me dhënë llogari prej majës së shtetit atje, qysh e kanë nis ata e me dhënë llogari secili për përgjegjësinë e vet, e jo veç me qit emra kujt t’i teket me këto farë politika”, shprehet Lushtaku.

Ai thotë se “dihet haptas kush i ka fry listat e kush s’i ka fry”, duke shtuar se nuk është ai që merret me këto çështje. Lushtaku pohon se edhe në brigadën e tij ka pasur fryrje të listave.

“Ka pasur një rritje të vogël, ku ua ka lejuar ligji dhe ka pasur një rritje për 10-15 për qind që në bazë të ligjit që e kanë bo normal ju ka mundësua m’u kanë veteranë”, tha ai.

Ndryshe, një ditë më parë në media është raportuar se prokurori i Prokurorisë Speciale Elez  Blakaj kishte ngritur aktakuzë më 11 korrik 2018 ndaj profilit të lartë të veteranëve dhe listës së personave të akuzuar i prinë Agim Çeku, i pasuar nga Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja, Ahmet Daku, Rrustem Berisha, Faik Fazliu, Smajl Elezaj dhe Xhavit Jashar.

Mirëpo ngritja e një aktakuze të tillë është mohuar gjatë ditës së sotme nga Prokurori i Prokurorisë Speciale, Sylë Hoxha, i cili në një prononcim për “Zëri” ka thënë se nuk ekziston asnjë aktakuzë e tillë. Rasti sipas tij ende është nënë hetime.